Kreu i ISHP-së inspekton minierën e Bulqizës: Rritje të standardeve në punë.

Kreu i Inspektoratit Shtetëror të Punës, Dritan Ylli inspektoi sot minierën e Bulqizës.

Gjatë kësaj vizite kreu i Inspektoriatit të Punës, u takua me drejtues të kompanisë Albchrome që administrojnë minierën, me përfaqësues të sindikatave të minatorëve, si dhe bashkëbisedoi me disa prej minatorëve që punojnë në këtë minierë.

Drejtuesit e Inspektoratit u njohën nga afër me masat që kishte marrë kompania për pajisjet individuale mbrojtëse dhe veshjet përkatëse për minatorët, për kushtet higjienike siç janë dhomat e ndërrimit të rrobave, dushet, ngrohja, etj. Nga ana tjetër drejtuesit e Inspektoratit kërkuan të njihen në mënyrë të detajuar me praninë e shërbimit të kontrollit mjekësor, që është një domosdoshmëri në një proces të tillë pune me risk të lartë përsa i perket aksidenteve dhe sëmundjeve profesionale.

Ndërkaq Kryeinspektori Dritan Ylli në një prononcim për mediat u shpreh se: “Industria minerare aktualisht është ndër sektorët më të vështirë të ekonomisë, për vetë natyrën e punës, e cila ofron një risk të lartë për aksidentet dhe dëmtimin e shëndetit të punonjësve, do të jetë gjithnjë në kontroll të vazhdueshëm dhe monitorim nga inspektorët e punës”.

Gjatë 3 muajve të fundit në Burrel janë evidentuar rreth 350 subjekte të palicencuara me 415 punonjës që punonin në të zezë, kontribues të munguar në skemën e sigurimeve shoqërore dhe në buxhetin e shtetit. Më pas Kreu i Inspektoratit Dritan Ylli se bashku me drejtues të tjerë të institucionit zhvilluan një takim në Burrel me rreth 50 përfaqësues të biznesit të zonës së Matit dhe Dibrës.