Pentagoni konfirmon: Ukraina do t’i përdorë armët amerikane në territorin rus

Administrata e presidentit Biden i ka dhënë leje Ukrainës të përdorë armët amerikane kundër objektivave në tokën ruse. Lajmin e konfirmoi një zyrtar i Departamentit Amerikan të Mbrojtje, për agjencinë ruse të lajmeve, TASS.

“Presidenti kohët e fundit ka udhëzuar ekipin e tij për të siguruar që Ukraina të jetë në gjendje të përdorë armët që i janë furnizuar nga SHBA për qëllime kundër zjarrit në rajonin e Kharkovit, në mënyrë që Ukraina të mund të kundërpërgjigjet kundër forcave ruse që po e sulmojnë ose po përgatiten për ta sulmuar ato”, tha zyrtari, duke iu përgjigjur një pyetjeje nga TASS.

"Politika jonë në lidhje me ndalimin e përdorimit të ATACMS ose sulmeve me rreze të gjatë brenda Rusisë nuk ka ndryshuar," shtoi ai.

Gazeta Politico raportoi të enjten, duke cituar katër individë të paidentifikuar, dy prej të cilëve zyrtarë amerikanë, se presidenti i SHBA Joe Biden i ka dhënë qeverisë së Kievit një leje sekrete për të përdorur armët amerikane për të sulmuar objektivat në territorin rus. Leja vlen për rajonet ruse që kufizojnë rajonin verilindor të Ukrainës, Kharkov.

Ndërkohë, në një intervistë me Economist, Sekretari i Përgjithshëm i NATO-s, Jens Stoltenberg sugjeroi se aleatët e NATO-s duhet të rishqyrtojnë nëse Ukraina mund t’i përdorë armët e Perëndimit për të kryer sulme ndaj objekteve ushtarake brenda kufijve të njohur ndërkombëtarisht të Rusisë. Më 28 maj, presidenti rus Vladimir Putin tha se kur flasin për sulme brenda Rusisë, përfaqësuesit e vendeve të NATO-s "duhet të jenë të vetëdijshëm se me çfarë po luajnë". Sipas Putin, Rusia po e monitoron nga afër një diskutim të tillë. Sapo ushtria e Ukrainës të përdorë armë me rreze të gjatë, Moskës do t'i duhet sërish të vendosë për "një zonë sanitare", tha Putin.