Kinezët hartojnë atlasin më të detajuar të Hënës

Më shumë se dhjetë vjet punë e bërë nga mbi 100 studiues është finalizuar me atlasin e parë të detajuar të Hënës. I hartuar nga Akademia Kineze e Shkencave, atlasi është një hartë gjeologjike me rezolucion të lartë të Hënës, në shkallën 1:2 500 000.

Ai përfaqëson një hap të rëndësishëm përpara për eksplorimin dhe kërkimin e hapësirës, ​​sepse tregon detaje të reja të sipërfaqes hënore.

Hartat e satelitit tonë natyror, të ndërtuara mbi të dhënat nga misionet Apollo të NASA-s, datojnë në vitet 1960 dhe 1970, në një shkallë prej 1:500 000 000 dhe nuk arrinin të plotësonin më nevojat e kërkimit modern.

Atlasi i Hënës tregon në detaje 12 341 kratere, 81 pellgje dhe 17 lloje të ndryshme shkëmbinjsh hënorë, së bashku me informacione të tjera themelore gjeologjike.

Kina, së bashku me Rusinë dhe disa vende të tjera po punojnë për ndërtimin e Stacionit Ndërkombëtar të Kërkimeve Hënore, një projekt ambicioz që parashikon një prani për eksplorimin shkencor dhe shfrytëzimin e burimeve në polin jugor të Hënës, duke filluar nga mesi i dytë i viteve tridhjetë.

Për të përpiluar atlasin, i cili është i disponueshëm edhe në anglisht në platformën Digital Moon cloud, studiuesit përdorën të dhëna nga misionet hapësinore kineze.

Superharta e re do të jetë pika fillestare për kryerjen e studimeve dhe misioneve të ardhshme eksploruese, veçanërisht për të përcaktuar se ku të ndërtohet një bazë kërkimore. Po ashtu, ai do të lehtësojë studimin e historisë gjeologjike të Hënës dhe burimeve të saj të mundshme, duke hapur rrugën për zbulime dhe aventurat hapësinore.