Bashkia e Tiranës i dhuron SPAK-ut godinën e re të UKT-së...5 mln€

Bashkia e Tiranës i ka dhënë SPAK-ut godinën e re të Ujësjellës-Kanalizimeve. Në mbledhjen e datës 12 korrik 2022, Këshilli Bashkiak ka dhënë pëlqimin për shqyrtimin e kërkesës së KLP-së për t’i transferuar SPAK-ut pronësinë e godinës së re në rrugën “Jordan Misja”.

Ndërtesa 6-katëshe me vlerë rreth 5 milionë dollarë është përfunduar. Ajo ndodhet në afërsi të Dhomës Penale, jo shumë larg nga organi kryesor i akuzës, në të cilin emri i kryebashkiakut Erion Veliaj ka përfunduar disa herë për çështje të ndryshme që nisin që nga Teatri Kombëtar, inceneratorët, përgjimet e Ndraghetës etj.

Vetëm për shembjen e Teatrit Kombëtar, ndaj Veliajt janë depozituar në SPAK 19 kallëzime penale. Megjithatë, pavarësisht numrit të madh të kallëzimeve, nuk është ngritur asnjë padi deri tani ndaj kryebashkiakut të Tiranës.

Pa asnjë pengesë për shkak të mungesës së opozitës në Këshillin Bashkiak, tashmë ndërtesa e planifikuar për UKT-në do të vihet në shërbim të Strukturës së Posaçme Antikorrupsion.