Berisha improvizon: Mosdënimi i komunizmit në Shqipëri, fajtore e Majta europiane dhe Soros

Sali Berisha, ish-president dhe ish-kryeministër i Shqipërisë ka marrë pjesë sot në Samitin e Lirisë në Tiranë ku ka folur për komunizmin në Shqipëri. Për të cilin mund të thuhet shumë, e mes të cilave është edhe dështimi i të djathtës së parë që prodhoi pluralizmi për të pastruar sa më shumë pasojat e tij. Berisha ka larë duart duke deklaruar se dy ishin faktorët që pamundësuan mosdënimin e krimeve të komunizmit:  E majta europiane dhe Soros.  

“Faktori i parë dhe kryesor që komunizmi nuk u dënua është E majta europiane. Socialistët në Europë gjetën me qindra arsye per të bllokuar një proces që ishte vital per shoqërinë. Disa përpjekje rudimentare u bënë nga Parlamenti Europian dhe Këshilli i Europës, per denimin e komunizmit por rezolutat nuk kishin fuqi detyruese. Keshtu qe e vërteta është se asnjëherë komunizmi nuk u dënua.

Faktori i dytë madhor, dhe e di që shumë prej jush do surprizoheni është faktori Xhorxh Soros. Po. Po ju them se Xhorxh Soros u bë një faktor thelbësor në ndihmën që u dha mbetjeve të komunizmit në vendet ish komuniste. Pse e them këtë? Fatmirësisht, Fatmiri (Mediu) e di dhe e mban mënd se që nga viti ‘93 jam përplasur shumë herë me të, dhe përplasjet e mia me të s’kanë të bëjnë me fitoren e Trump. Jo. Soros që në fillim ndihmoi partinë e opozitës. Ok, asnjë kundërshtim me këtë. Por ajo që ishte tmerrësisht e dëmshme, Soros ndërtoi një shoqëri civile totalisht të varur nga ish -partia komuniste, duke deformuar kështu esencën, thelbin kryesor të shoqërisë civile. Nëse merrni listën e shoqërisë civile në këtë vend, ju siguroj se 99% e tyre janë leva të ish partisë komuniste. Pra, në këtë drejtim ai dëmtoi shumë...”, tha Berisha.

Ka njeri që beson se kjo është e vërteta? Se mos-hapja e dosjeve, se përdorimi i ish-agjentëve të Sigurimit, flirtimi me njerëz të regjimit dhe banalizimi i antikomunizmit në zhgarravitje lapidarësh, nuk ishin një mënyrë për të diskredituar një proces kaq jetik? Natyrisht mundet të pranohet mosditja për të orientuar dekomunistizimin, por është e dyshimitë nëse ka patur një vullnet të tillë. Sidomos kur sheh se PS-ja dhe PD-ja ja kanë kaluar aq mirë në një pikë që përbën plagën sociale kryesore të ekonomisë në Shqipëri: të famshmin ligj 7501.