Ajri i ndotur rrit rezistencën antimikrobike

Një studim i shkencëtarëve kinezë dhe atyre britanikë ka arritur në një konkluzion surprizues. Sikur të mos mjaftonte ndikimi negativ direkt në shëndetin e njeriut, ndotja e ajrit ndikon edhe në rezistencën ndaj antibiotikëve.

Sipas studiuesve të universitetit Zheijang dhe atij të Kembrixhit, ndotësit e vegjël të ajrit lidhen me një shkallë më të lartë të baktereve vdekjeprurëse rezistente ndaj ilaçeve.

Konkluzioni del nga monitorimi i të dhënave nga 116 vende për periudhën mes viteve 2000 dhe 2018.

Rreth 11.5 milionë teste laboratorike analizuan nëntë patogjenë bakterialë dhe 43 lloje antibiotikësh.

“Analiza jonë paraqet prova të forta se rritja e niveleve të ndotjes së ajrit shoqërohet me rritjen e rrezikut të rezistencës ndaj antibiotikëve”, thanë autorët e studimit, të publikuar në The Lancet Planetary Health.

Vitet e fundit, rezistenca antimikrobike - një fenomen i shkaktuar nga insekte të tilla si bakteret, kërpudhat dhe parazitët që evoluojnë për të mbijetuar kundër trajtimeve me ilaçe – është rritur. Pa antibiotikë efektivë, operacionet rutinë dhe infeksione të lehta, mund të kthehen në kërcënim për jetën.

Shkencëtarët kanë zbuluar se thithja e grimcave të vogla - të krijuara zakonisht nga proceset industriale, transporti rrugor, djegia e qymyrit dhe drurit – është një mënyrë për t'u infektuar me një insekt rezistent ndaj ilaçeve. Kjo për shkak se lënda, e njohur si PM2.5, përmban baktere të ndryshme rezistente ndaj antibiotikëve dhe gjene rezistente ndaj antibiotikëve.

Rreth 1.3 milionë vdekje në vitin 2019 iu atribuuan drejtpërdrejt rezistencës antimikrobike.

Keqpërdorimi dhe përdorimi i tepërt i antibiotikëve është parë deri tani si shkaku kryesor i rezistencës ndaj antibiotikëve, por shkencëtarët zbuluan se çdo rritje prej 1 për qind e ndotjes së ajrit lidhej me rritje të rezistencës ndaj antibiotikëve midis 0.5 dhe 1.9 për qind, në varësi të patogjenit. Kjo lidhje është vënë re se po forcohet me kalimin e kohës.

Të dhënat që kanë mbledhur studiuesit sugjerojnë se rezistenca ndaj antibiotikëve që rezulton nga ndotja e ajrit është e lidhur me rreth 480 000 vdekje të parakohshme në vitin 2018, me një kosto ekonomike shtesë prej 395 miliardë dollarësh bazuar në vitet e jetës së humbur në çdo vend.