Macron i druhet "imperializmit të ri"

Presidenti francez, Emmanuel Macron, flet për një "imperializëm të ri" në Indo-Paqësor. “Në Indo-Paqësor, dhe veçanërisht në Oqeani, po shfaqet një imperializëm i ri dhe një logjikë fuqie që po kërcënon sovranitetin e disa shteteve, më të voglat, shpesh më të brishta,” tha Macron në një fjalim në Vanuatu. Presidenti francez ndodhet në një vizitë pesë-ditore në Paqësorin Jugor, ku është ndalur në territorin francez të Kaledonisë së Re, Papua Guinesë së Re dhe arkipelagut të Vanuatusë.

Megjithëse nuk i përmendi me emër, Macron iu referua SHBA-së dhe Kinës. Të dyja kanë interesa dhe po përpiqen të rrisin praninë në rajon.

Presidenti francez denoncoi “peshkimin e paligjshëm” në ujërat detare, shfrytëzimin e mineraleve të rralla dhe huatë zhvatëse të ofruara për shtetet më të vogla.

Macron është përpjekur të mbajë njëfarë ekuilibri vitet e fundit mes aleancës historike të Francës me SHBA-në dhe kombeve të tjera perëndimore, dhe dëshirës së tij për të luajtur një rol si " fuqi balancuese" në rajonin e Paqësorit. Ai tha se Franca do t’i mbështesë “pavarësinë dhe sovranitetin e tyre”.

“Rendi global është plotësisht i shqetësuar nga gatishmëria e fuqive të reja botërore për të rrezikuar rendin botëror dhe për të pushtuar vende të tjera, si Rusia që pushton Ukrainën”, tha ai.

"Fuqitë e tjera të mëdha rajonale po ju testojnë, duke na testuar mbi sovranitetin tonë detar," shtoi ai. Franca ka disa territore në Oqeanin Paqësor, mes të cilave Kaledoninë e Re, Polinezinë Franceze dhe ishujt Wallis dhe Futuna.

Pekini po kërkon të rrisë ndikimin e tij në Paqësorin Jugor, veçanërisht duke nënshkruar një marrëveshje mbrojtëse me Ishujt Solomon vitin e kaluar. Shtetet e Bashkuara janë angazhuar me ndihmë të re për rajonin dhe nënshkrimin e pakteve të mbrojtjes, duke përfshirë edhe me Papua Guinenë e Re.

Macron njoftoi investime të reja zhvillimi, hapjen e një zyre për agjencinë franceze të zhvillimit dhe rritjen e bashkëpunimit në mbikëqyrjen detare. Sipas Le Monde, investimet franceze në rajon janë të pakta në raport me ato të Australisë, e cila shpenzoi 74 milionë euro në Vanuatu vitin e kaluar, krahasuar me 8 milionë euro të Francës.