Elbasan, banorët protestojnë ndaj ujërave të zeza

Dhjetëra banorë të Lagjes 5 Maji në Elbasan u ngritën në protestë, pasi që prej dhjetë vjetësh, atyre u duhet të bashkëjetojnë me ujërat e zeza. Sikur të mos mjaftonte ndotja industriale dhe ajo që vjen nga fusha e plehërave, atyre u duhet të jetojnë edhe me fekalet, që kalojnë rrëzë mureve të shtëpive të tyre. Në kanalin kryesor të kësaj lagjeje, 3 kilometra të gjatë, derdhen ujërat e zeza të 20 mijë banorëve, të cilat përshkojnë gjithë lagjen për tu derdhur më pas në lumin Shkumbin. 

"Po bëjmë gati 10 vjet që e kemi problem këtë kanal. Akush nuk e vret mendjen për ne", shprehet një nga banorë e zonës.
Ata thonë se drejtues të Rajonit Nr.5, që administron edhe këtë zonë, nuk kanë pranuar të dëgjojnë ankesat e këtij komuniteti. Këta drejtues nuk kanë pranuar as të prononcohen për mediat me justifikimet se janë të angazhuar me mbledhje apo detyra të tjera të rëndësishme.

Besim Dybeli

Albanian Screen