Zagarët e Procedurës!

A ka të drejtë SPAK? A po hetohet si duhet Veliaj? Masa e arrestit është e tepërt...

Këto janë disa nga tezat që dëgjon papushim për rastin e Zdromsit. Nga "analistë juristë që mbushin banaqet e darkës në ekrane dbe klube dhe  nuk duan të lënë të vërtetën ligjore të dalë nga institucionet e reja të drejtësisë që për herë të parë që nha 1912 i janë afruar politikës".

A nuk duhet të fliste kështu kryeministri Rama? Sa herë është shprehur kështu duke masturbuar mandej me inteligjencën e vet eprore!?

Jo, ai nuk flet më. Ai flet ndryshe dhe kësaj radhe banaqet dhe analistët po bëjnë punën e tij.

Fundja ai tha se “beteja e Veliajt nuk është e imja”, ndërkohë që këta që dalin studiove sa vijnë e marrin rolin e Zagarit. Të kuptohemi drejt se mos i mbetet qejfi kujt e nuk na zë gjumi: jo zagarit të Lalit, por Zagarit, apo Qënit me erë të Procedurës.

Sepse Procedura qenka viktima e madhe, mbi të ka marrë shënjestër SPAK-u dhe GJKKO dhe tani zagarët janë lëshuar ta kapin. Dhe t’ia vënë para këmbëve sovranit. Kjo është.

E themi këtë për ata që si ne u keqkuptuam në fillim e menduam se këta po mbronin Veliajn. Jo. Këta po mbrojnë procedurën, standardin e drejtësisë. Janë zagarë të veçantë: nuk ka rast të dytë sesa shumë po vrapojnë për ta kapur procedurën e qëlluar. Ja p.sh sesi Rakipllari arsyeton veçmas në një aspekt:

Veliaj nuk është hetuar për korrupsion ne Bashki. Është bërë një viktimë financiare. Standardi duhet të bëhet për të gjithë politikanët e rangut të tij.

Rasti i Veliajt është sui generis, se është politikan në detyrë. Rasti i Veliajt është rasti i vetingut ndaj një politikani, të bëhet për të gjithë. Për Berishën është afera Partizani. Ai ishte kryeministër. Çfarë firme ka pasur Veliaj? Veliajt i është bërë veting financiar. Ok të bëhet, por të merren të gjithë politikanët e rangut të tij. E kam lexuar dosjen e plotë. Ky standard i një vetingu ndaj një politikani duhet të bëhet ndaj gjithë rangut të politikanëve të rangut të tij

Pse qëndron veçmas ky? Ka shumë arsye por ne po themi se ky ka shkuar më tej: ky gjykon politikën penale të SPAK duke kërkuar forcën e precedentit për dosjet e politikanëve. Çfarë inteligjence! Çfarë sharmi! Puna është se nuk ka sesi kjo të ndodhë në këtë formë, pasi dosjet shqyrtohen në meritën e provave. Pra: vërtet që  në dosje mund të rrëmohet mirë e një tjetër përciptaz, por kjo nuk zhbën fajësi dhe pafajësi si të tilla. Kjo nuk e bën të pafajshëm publikisht Veliajn dhe të fajshëm një tjetër. Gjykata mund të kërkojë më shumë prova e me radhë.

Çdokush pret nga një gazetar të dyshojë përherë vërtetësinë e deklarimeve të një politikani sipas rregullit të vjetër të raportit pushtet- interes publik. Në Shqipërinë e banaqeve mediatike ndodh e kundërta. Çfarë e shpjegon këtë sjellje? Askush nuk mund ta dijë. E vërteta fshihet në kasafortat e logjikës dhe shpirtit.

Por megjithatë kjo artileri dyshimesh mbi drejtësinë injoron faktin se gjykata do çmojë provat, se i akuzuari ka avokat dhe negocioi me para masën e sigurisë, se ai nuk ka bërë formaliaht asnjë pretendim juridik për proces të parregullt, se ai  nuk ka bërë kallëzim penal për pretendimin se banesa iu kontrollua pa vendim gjykate. Ky individ është pajtuar me procedurën të cilën e mallkoi sapo e kapën nga zhelet dhe e çuan aty ku ka vendin.

Zagarët e procedurës këtu të kujtojnë të famshmen Prokurori Popullore të kohës së Diktaturës, por ca më keq madje: ajo supozohej të ndihmonte me procedim “demokratik” për krime të lehta, ndërkohë që këta dalmatianë të paqetësueshëm e kanë me akuzën.

Po pse lehin kështu xhanëm,-do pyesë dikush.

Epo:

Qeni leh ku i hedhin për të ngrënë

thotë një fjalë. Kështu që vazhdoni deri në datën e Apelit,  në mos ndodhtë ndonjë gjë tjetër e ju shkon shkuma huq dhe tundja e bishtit kot.