‘Fajkoi’ Ngjela kundër ‘pëllumbit’ Rama

Dje, kryetari i Partisë Socialiste, Edi Rama, dha një intervistë për Shekullin, në të cilën binte në sy një si mea culpa për ndryshimet kushtetuese të vitit 2008, të bëra me shpejtësi marramendëse në bashkëpunim me Berishën, dhe një ndryshim kursi, i cili besohet të jetë rezultat i presionit të ndërkombëtarëve mbi të. “Vjedhjen e zgjedhjeve duhet ta paguajë Saliu duke ikur, e jo Shqipëria duke u djegur”, tha ai në mënyrë tekstuale. Kjo frazë, tok me aksionin “e urtë” opozitar që ajo paralajmëron, ka pickuar do fajkonj të opozitës. Një nga këta është Spartak Ngjela, i cili është parë vitet e fundit si eminenca gri e leader-it të opozitës. “Ne po jetojmë nën një regjim tiranik”, tha pak a shumë në faqet e së njëjtës gazetë politikani që, duke u përpjekur të ruajë një linjë të vetën, ka provuar të veshë ‘tutte le casacche’ në karrierën e vet politike. “Dhe tiranive duhet t’u japësh ultimatume, dhe t’u vendosësh një datë. Çdo rrugë tjetër është sorrollatje nëpër kallamishte”, përfundon ai arsyetimin. I pyetur lidhur me negociatat e mundshme mes Ramës e Berishës, Ngjela nuk nguron të bëjë një paralele të fortë: “Me një fashizëm oriental si ky që përfaqëson Saliu, nuk mund të ketë bisedime. Duhet të kujtoni historinë: Hitleri, sa herë që pushtonte një vend në Europë, i kërkonte anglezëve negociata. Por Churchill-i ia theu hundët”.

E.G.