WikiLeaks-i hedh online kabllogramet: t’i lexojë kush të dojë

250 mijë dokumentat e Departamentit Amerikan të Shtetit, që kanë qenë prej kohësh në duart e botuesit e gazetarit australian, Julian Assange, tani janë në duart e gjithkujt. Assange ka marrë vendimin pas një “tradhëtie të gazetës the Guardian” të pretenduar nga ana e WikiLeaks-it. Sipas këtij site-i, një file që përmbante të gjithë database-in ishte bërë i aksesueshëm nga një gazetar i gazetës londineze, i cili ka bërë publik password-in në një libër të publikuar ca muaj më parë. Drejtuesit e gazetës the Guardian e kanë hedhur poshtë këtë akuzë, duke thënë se së pari password-i ishte i përkohshëm, dhe se së dyti nuk janë dhënë detaje nga ana e gazetarit mbi vendndodhjen e file-it.

Vendimi i Assange-t është kritikuar nga të gjitha drejtimet. Edhe një pjesë e organizatave që janë rreshtuar fort në favor të lirisë për t’u informuar, nuk kanë mundur të anashkalojnë në këtë rast faktin që, pas publikimit en bloc të këtyre kabllogrameve, një numër aktivistësh, agjentësh, diplomatësh, e deri dhe gazetarësh, do të jenë me krye në trastë. Gazetat partnere të WikiLeaks-it në këtë “aventurë”, dmth Guardian, New York Times, El Pais e Der Spiegel, e kanë konsideruar të papërgjegjshëm këtë vendim, që vë në rrezik shumë njerëz, të cilët nuk ka pse të përzjehen e të rrezikohen. “Nëse këtej e tutje do të ketë pasoja, ato do të jenë të Julian Assange-it”, kanë shkruar në thelb gazetat, që deri pak kohë më parë ishin pjesë e aksionit gazetaresk për të bërë transparente diplomacinë e SHBA-ve.

Vendimi është marrë, sidoqoftë. Tanimë nuk ka më kthim pas. Të gjithë e kanë mësuar vendin, ku mund të gjejnë pa asnjë mundim materiale konfidenciale, apo top-secret të diplomacisë amerikane. Ja link-et mbi bazën e mënyrës së kërkimit:   http://cables.mrkva.eu/. http://wikileaks.org/cablegate.html, http://www.cablegatesearch.net/search.php

Re.Pu.