ABC, intervista ekskluzive të Jackie Kennedy me historianin Schlesinger

Rrjeti televiziv amerikan ABC do të transmetojë disa intervista ekskluzive me Jacqueline Kennedy më 13 shtator. Sipas Associated Press shikuesit do të dëgjojnë nga ish-zonja e parë e Amerikës një bisedë me historianin Arthur Schlesinger Jr. rreth jetës në Shtëpinë e Bardhë. Intervistat do të rrotullohen te raporti i saj me të shoqin, Presidentin amerikan John F. Kennedy. Incizimet e këtyre bisedave qenë bërë pak muaj pas vrasjes së Presidentit Kennedy në vitin 1963, por ato u mbajtën të arkivuara deri më tash. Sipas Associated Press, ABC fillimisht kishte planifikuar transmetimin e tyre me një kohëzgjatje prej një ore, por planet ndryshuan. Tani intervistat do të të transmetohen për plot dy orë në prime time dhe do të shoqërohen me një intervistë speciale të Diane Sawyer-it me vajzën e Jackie dhe JFK, Caroline Kennedy. Ky transmetim special i ABC është menduar të përkojë me botimin e një libri rreth intervistave të historianit Arthur Schlesinger Jr. me Jackie-n. Transmetimi i tyre përkon gjithashtu me përvjetorin e 50-të të administratës Kennedy. Jackie Kennedy më vonë u martua me manjatin grek Aristotle Onassis. Ajo vdiq në vitin 1994 në moshën 64 vjeçare.

L.A