Universitetet më të mira të botës janë në SHBA e Angli

Cili është universiteti më i mirë në botë? Nuk ka ndonjë befasi në këtë mes. Është  ai i Cambridge-it. I Cambridge-it në Angli. Në vend të dytë është po Cambridge-i, e mos kujtoni se është lojë fjalësh. Është fjala për universitetin e qytetit tjetër me të nëjjtin emër, por këtë herë në Massachusetts, SHBA. Universiteti amerikan njihet me emrin e Harvard-it. Pastaj vjen Massachusetts Institute of Technology (MIT), ose thënë në shqip Instituti i Teknologjisë në Massachusetts. Në vend të katërt mbetet sërish një universitet amerikan, ai i Yale-it. Në fakt, vendet e para ndahen mes Anglisë e e SHBA-ve. Pas Yale-it vjen një universitet i famshëm, ai i Oxford-it. Në vend të gjashtë është Imperial College London, ose në shqip (nëse ka kuptim të përkthehet në shqip emri i një universiteti të njohur), Kolegji perandorak i Londrës. Pastaj vinë me radhë UCL (University College London), Universiteti i Chicago-s (SHBA), Universiteti i Pensilvanisë (SHBA), Columbia University e Stanford University, California Institute of Technology (Caltech), Princeton University, Universiteti i Michigan-it, Universiteti i Cornell-it, Universiteti Johns Hopkins, që të gjithë amerikanë. Vetëm në vendin e 16-ë e 17-ë vijnë një universitet kanadez (McGill University) e një zviceran (ETH Zurich, Swiss Federal Institute of Technology), e pastaj vinë prapë universitetet amerikane e britanike. Universitetet franceze École Normale Supérieure, Paris, dhe École Polytechnique vinë respektivisht në vendin 33 e 36. Ndërsa Universiteti i Bolonjës vjen në vendin e 183-të.

Kush do informacion më të detajuar, mund të shkojë në link-un http://www.topuniversities.com/university-rankings/world-university-rankings/2011

E.G.