Aleanca Kuqezi, një Vetvendosje soft?

Fillimet e Aleancës Kuqezi (AK) lidhen me kundërshtimin e aktivistëve të saj ndaj regjistrimit të etnisë dhe fesë në Republikën e Shqipërisë. Shqetësimi i tyre ishte se shqiptarë të zonave të jugut mund të deklaroheshin si grekë, të ndikuar nga rrethanat ekonomiko-shoqërore dhe nga trysnia e shtetit dhe qarqeve tw ndryshme greke. Me mbarimin e regjistrimit të popullsisë, aktivitetet dhe mesazhet e AK-së gjithnjë e më tepër janë orientuar drejt temës së madhe kombëtare të bashkimit të trojeve shqiptare.

Edhe sot, aktivistët e AK-së kanë zhvilluar një aktivitet në Prekaz, ku kanë bërë homazhe në varrin e komandantit legjendar të UÇK-së, Adem Jashari. Aktivistët kanë mbajtur në dorë shumë parrulla, ku spikaste në veçanti njëra: “Bac, do ta kryjm!”. Kjo parrullë, sfidon drejtpërdrejt kryeministrin aktual të Kosovës, i cili, pas shpalljes së pavarsisë së saj, ka thënë para varrit të Jasharit: “Bac, u kry”. Një ditë më parë, Kreshnik Spahiu deklaroi në një tubim në Vlorë se politikanët në Tiranë e në Prishtinë janë pengesa kryesore për bashkimin e Kosovës me Shqipërinë, sepse asnjëra palë nuk do të ndajë pushtet.

Si ligjërimi, ashtu dhe aksionet e AK-së, janë të ngjashme me të Vetvendosjes së udhëhequr nga Albin Kurti, por sidoqoftë janë shumë më pak agresive dhe duket se kanë një horizont afatgjatë. Spahiu ka deklaruar disa herë se në Bruksel do të shkojmë të bashkuar (duke nënkuptuar se bashkimi s’do të jetë i shpejtë), ndërsa Kurti e kërkon bashkimin sot, asnjë ditë më vonë…

E.Zaloshnja