Lulzimi i Belle Air-it ta ketë shpëtuar ekonominë nga tkurrja?

Ndërkohë që nuk bëri budallallëkun që të raportonte për tremujorin e dytë të 2011-ës një rritje të shëndetshme ekonomike (në përputhje me vlerësimet optimiste të qeverisë), INSTAT-i raportoi një rritje fenomenale të volumit të transportit. Kështu, sipas tij, rritja reale (pra, me çmime fikse) e Produktit të Brendshëm Bruto (PBB) në sektorin e transportit ka qenë pothuaj 15% në tremujorin e dytë të 2011-ës, krahasuar me të njëjtin tremujor të një viti më parë. Ndërkohë, rritja e PBB-së për të gjithë sektorët së bashku (pra, për të gjithë ekonominë) është raportuar të ketë qenë vetëm gjysëm përqind (shihni tabelën e mëposhtme). Pa rritjen fenomenale të sektorit të transportit, ekonomia, pa dyshim, do të kishte rezultuar me tkurrje në tremujorin e dytë të 2011-ës.

Që transporti të ketë patur një rritje 15%, duhej që sektorët e tjerë si industria, ndërtimi, tregëtia, hoteleria dhe restorantet të kishin patur një rritje të ndjeshme. Sepse transporti është në funksion të këtyre sektorëve. Por, në fakt, ato ose kanë patur ulje të ndjeshme, ose stanjacion. E vetmja degë që ka patur rritje për t’u marrë në konsideratë ka qenë bujqësia (3.4%), por pesha e saj në PBB nuk e justifikon rritjen fenomenale të transportit.

Një gjë që s’ka qenë e lidhur me zhvillimet e brendshme ekonomike ka qenë shtimi i fluturimeve të Belle Air-it, kompanisë ajrore shqiptare që ka përfituar shumë nga vendimet penalizuese të agjensive qeveritare ndaj konkurentëve të saj vendas (Albatros dhe Albanian Airlines). Shitjet e biletave të Belle Air-it mund të kenë kapur maja shumë të larta, dhe të kenë ndikuar kështu ndjeshëm në PBB-në e sektorit të transportit. Kjo hamendje mbështetet edhe nga fakti se sektori i transportit ka patur një rritje mesatare dyshifrore në 6 tremujorët e periudhës 1 janar 2010 - 30 qershor 2011, periudhë kur lulëzimi i Belle Air-it ka qenë i dukshëm.

E.Zaloshnja

Sektori

Rritja reale e PBB-së në tremujorin e dytë 2011, krahasuar me të njëjtin tremujor të një viti më parë

Industri

-8.5%

Ndërtim

-1.7%

Tregëti, Hoteleri & Restorante

0.3%

Bujqësi

3.4%

Transport

14.9%

Telekomunikacion

-2.1%

Sherbime

1.2%

E gjithë ekonomia

0.5%