Nesër mbyllet gjyqi, por dueli Prifti-Meta do të vazhdojë

Cili do të jetë vendimi që do të japë nesër Gjykata e Lartë në ngarkim të të pandehurit Ilir Meta? Për shqiptarët e dhënë pas ‘gossip-it e voyeurism-it’, kjo nuk ka shumë rëndësi, pasi ‘saga epike’ e përgjimeve do të vazhdojë. Këtë e premtoi sot Dritan Prifti, i cili iu përgjigj në një dalje deklarative për mediat protagonizmit të Metës që ish shfaqur disa orë më parë për ta përqeshur si “ordinere e të së shkuarës” çështjen e marrë në shqyrtim në Gjykatën supreme të Shqipërisë.

Prifti ishte vibrant e i tonifikuar në deklaratën e tij për shtypin, gjë që mund të ketë lidhje edhe me një ngjarje të konsumuar në një mbledhje forumesh të LSI-së, për të cilën nuk është ditur gjë e në të cilën Meta paska shfaqur për anëtarët e forumit pamje nga video-përgjimi i bisedës Prifti-Beqiri që, sipas Metës, e nxjerr Priftin zbuluar. “Kjo video ka rrjedhur nga ekspertët, pasi ajo ka qenë  vetëm në pajisjet që i janë dorëzuar prokurorisë dhe i janë nënshtruar ekspertizës para dy muajsh”, ka hedhur dyshimet Prifti, dhe ka shtuar, se “do të publikojë të tjera video, përmes të cilave do të tregojë me zë dhe figurë vjedhje të reja dhe të vjetra të çiftit Meta-Kryemadhi, dhe se si ai trajton marrëdhëniet me miqtë dhe ndërkombëtarët".

Vendimi i Gjykatës së Lartë ka rëndësi të madhe, megjithatë. Në shumë kuptime. Duhet të pritet dita e nesërme.

Re.Pu.