Ç’po ndodh në Merdare e në Dheun e Bardhë? Ja ç’thonë gazetat e Prishtinës

Zëri i Prishtinës ka një lajm me titull “Rrihen përkrahësit nga Shqipëria”, por ne tekstin e lajmit nuk pohohet kjo gjë (ndoshta janë duke e përditësuar lajmin). Hë për hë, aty thuhet se “aktivistë të Vetëvendosjes raportojnë se në pikën kufitare të Morinit, 2 autobusë që janë nisur nga Shqipëria për t’iu bashkëngjitur protestës së Vetëvendosjes, e kanë kaluar kontrollin kufitar të Shqipërisë, mirëpo janë ndaluar nga Policia e Kosovës dhe nuk po lejohen të hyjnë në territorin e Kosovës.”

Gazeta Express fokusohet, ashtu si të gjitha gazetat, tek konfrontimi mes veprimtarëve e policisë në Podujevë, dhe raporton për një polic të lënduar, pasi është goditur me një tullë. Por ky fakt nuk konfirmohet nga burime të tjera.

Koha Ditore flet për pengesa të mëdha policore. “Në Morinë janë bllokuar autobusët me përkrahës të Vetëvendosjes që donin të vinin në Kosovë për ta ndihmuar atë në bllokimin e pikave kufitare me Serbinë. Një përkrahës i Vetvendosjes ka thënë për Top Channel se arsyetimi ishte për pengesa në sistemin kompjuterik, por ata sipas të gjitha gjasave nuk do të lejohen të hyjnë në Kosovë ”, thuhet në versionin online të kësaj gazete.

Agjencia telegrafi.com njofton se njerëzit e Vetvendosjes janë bllokuar, dhe nuk lejohen të shkojnë në Merdare. Sipaj kësaj agjencie, ata janë bllokuar në Besianë, tok me Albin Kurtin, i cili nga ana e vet ka bërë thirrje për qetësi. “Banorët e Merdares kanë dalë anës rrugës në mënyrë që t’i bashkohen manifestimit”, nënnvizojnë gazetarët e këtij ëebsite-i.

Re.Pu.