21 Janari në shifra: 41.4% protestuan prej varfërisë, 18% ishin me arsim të lartë ndërsa 72.7% nuk ishin anëtarë të PS

Ndërsa Prokuroria ka nevojë për më shumë kohë për të gjetur fajtorët e vërtetë të 21 Janarit, datë që po hyn në fjalorin tonë si 18 Brymeri i L. Napoleonit, JAVA ka gjetur një formë për të hedhur dritë mbi ngjarjen e kobshme të një viti më parë nëpërmjet shifrave. Sekretariati për çështjet ligjore në PS ka marrë në analizë të arrestuarit e të ndaluarit, prej nga del një kampion që mund të shërbejë si njësia më e mirë e mundëshme për të kuptuar kush ishin ata që dolën në demostratë.

Sipas grafikëve të përpiluar nga të dhënat e marra nga ky kampion, del që 4% nuk ishin në demostratë, ndërsa motivi kryesor që ka shtyrë 41.4% të demostronin ishte varfëria, 31.2% kishin dalë në protestë për shkak të padrejtësisë sociale dhe 23.4% për të demonstruar ndaj korrupsionit.  Vetëm 27.3% e tyre ishin anëtarë të PS, 44.4% me arsim të mesëm, 37.5% me arsim 8-vjeçar dhe 18% me arsim të lartë.

Mosha dominuese në demostratën e 21 Janarit, ishin të rinjtë nën 24 vjeç (52%), por, këtu marzhi i gabimit mund të jetë më i madh, sepse logjika të thotë që policia dhe agjentët e veshur civilë kanë ndaluar/arrestuar kryesisht elementët më aktivë në demonstratë. Për arsye të ngjashme, rezulton vetëm një femër e arrestuar, nënë e 5 fëmijëve. Grupmoshat e tjera të të ndaluarve/arrestuarve ishin 5% mbi 65 vjeç, 4% nga 55-64 vjeç, 4% nga 45-54 vjeç, 22% 25-34 vjeç.

n.s.