Pati edhe të plagosur nga armët e zjarrit në 21 janar!

Katër të vrarët nga plumbat e ardhur nga oborri i Kryeministrisë në 21 janar 2011, me plot të drejtë, kanë qenë në qendër të vëmendjes së mediave shqiptare gjatë vitit të fundit. Gjithashtu, një vend jo të parëndësishëm ka zënë në media edhe plagosja e Fatos Mahmutajt, gazetarit të ABC News që ka kërkuar azil politik në Belgjikë (ai u plagos në dorën që po mbante celularin në vesh – pra, për fare pak ka shpëtuar nga vdekja). Por nuk është folur shumë për katër të plagosurit e tjerë nga plumbat e ardhur nga oborri i Kryeministrisë në 21 janar 2011. Sot gazeta Shekulli na sjell detajet e plagosjes së njerit prej tyre - 24 vjeçarit Artes Dybeli. Për muaj të tërë ai ka qenë në agoni të plotë mes jetës dhe vdekjes. Plumbat e marrë në trup, njëri prej të cilëve i ka tejshpuar fytin, bënë që mjekët fillimisht t’i hiqnin çdo shpresë jete. Por falë kurimit në një klinikë gjermane, Artesi sot është gjallë. Ja një fragment i intervistës së tij dhënë Shekullit:

“Ku ju kanë marrë plumbat?

 Duke iu referuar kartelës mjekësore plumbi i parë ka hyrë poshtë mjekrës dhe ka tejshpuar fytin. Mjekët më thanë që plumbi ka kaluar vetëm për 1 milimetër larg arteries kryesore, kordave të zërit, dëgjimit si dhe nazofagut. Ndërsa plumbin e dytë e kam marr pak sekonda më vonë në shpatullën e djathtë dhe ai ka qenë tejshpues.

Nga cili drejtim vinin plumbat?

 Nga pjesa e brendshme e Kryeministrisë. Jua thashë unë jam qëlluar sapo një makinë i është afruar derës së jashtme të këtij institucioni dhe në atë moment po shikoja se si një togë ushtarakësh po vendoseshin në rrjesht duke qëlluar në drejtimin tonë.

Ju keni qëlluar mbi policinë?

 Unë? As kam qëlluar mbi policinë e as nuk kam kapur qoftë edhe një gur me dorë.”

Nga këto fjalë të Artesit, kuptohet se edhe ai, si gazetari Mahmutaj, për fare pak ka shpëtuar nga vdekja. Dhe nga sa kemi parë në videon e Ziver Veizit, për fare pak kanë shpëtuar edhe ata që ishin pranë tij. Përveçse për katër jetët e humbura, kush urdhëroi për hapjen e zjarrit në drejtim të turmës në 21 janar, duhet të përgjigjet edhe për të gjithë ata që për fare pak kanë shpëtuar nga vdekja.

E.Zaloshnja