Totozani merr në mbrojtje romët dhe premton një denoncim spektakolar të autoriteteve

Televizioni Top-channel jepte mbrëmë në edicionin qendror të lajmeve avokatin e Popullit, Igli Ttotozani, që kish takuar një grup romësh të shpërngulur dhunshëm muaj më parë nga vendi ku kishin ngritur çadrat e tyre të banimit, diku afër stacionit të trenit. Mbi atë ngjarje nuk u hodh dritë asnjë herë, ndonëse zhurma mediatike qe e fortë e ndonëse vetë ngjarja qe tronditëse.

Totozani ka shkuar t’i takojë “në shtëpitëve tyre të reja”, diku në Sauk, nga ku duan t’i dëbojnë dhe njëherë tjetër . Këtë herë janë pronarët e tokave të zëna; të paktën, kështu pretendohet prej tyre. Avokati i popullit u shfaq i vendosur për t’mos e lejuar më këtë ‘trasloco’ allasoj. Madje, ai u bëri një premtim romëve të ngratë (që mori formën e kërcënimit për autoritete të tjera): “Nëse ju heqin menjëherë prej këtu ku jeni, do t’ju lejoj të ngrini çadrat përpara institucionit që unë drejtoj.”

Zyrat e Avokatit të Popullit janë ngjitur me Ministrinë e Jashtme, e në këto rrethana do kishim të bënim me një gjetje interesante për të bërë një denoncim spektakolar të autoriteteve shtetërore që s’e vënë ujin në zjarr për një numër qytetarësh që gdhihen e ngrysen pa asnjë strehë në këto ditë të acarta.

Re.Pu.