Lulzim Basha në SHBA, dhe një rrenë për t’u futur në librin Guinness

Agjencia Balcan Insight është përpjekur të flasë sot me zëdhënësin e bashkisë së Tiranës, që ajo e identifikon me emrin Erald Karpri (duhet të ketë një gabim në mbiemër; ndoshta ndonjë gërmë tepër: Karpri s’duket si mbiemër i këtyre anëve), në mënyrë që të marrë informacion zyrtar lidhur me vizitën e Lulzim Bashës në SHBA. “Është dikush që e ka ftuar Lulzim Bashën në SHBA, dhe kush është ky?”, ka qenë pyetja fare e thjeshtë, dhe zëdhënësi nuk ka mundur të thotë asgjë, veçse “ne do të nxjerrim më vonë një deklaratë për shtypin, dhe aty do të ketë detaje”. Ky interes i medias Balcan Insight ka lindur prej pompave e bujës së shtypit proqeveritar, që e kanë përcjellë Bashën si një vizitor të madh e të shumëpritur në tokën amerikane.

Mirëpo paska qenë e gjitha e ndërtuar mbi një hiç. Doxie McCoy, zëdhënësi i bashkisë së Washingtonit, me fjalë të tjerë, kolegu i Eraldit të Tiranës, i ka thënë sot gazetarëve të Balcan Insight-it, se kryebashkiaku i Washingtonit, Vincent Gray, nuk i ka bërë ndonjë ftesë Lulzim Bashës. “Por një takim do të bëhet nesër”, saktësoi zëdhënësi, pa e ditur se po zbulonte një scoop (e nga ta dinte?). “Një shqiptaro-amerikan i këtushëm i ka kërkuar zotit Gray që të bëjë, brenda mundësive, një takim kortezie me kryebashkiakun e Tiranës që ndodhet në Washington, dhe kështu takimi do të bëhet; do të jetë një takim i shkurtër”. Kjo është e gjitha.

Si është e mundur që kanë sajuar një rrenë kaq të trashë?

M.N.