S’i pengon shtetësia investitorët e huaj, por problemi me pronat dhe ca të tjerë

Vetëm dy ditë zgjati diskutimi në media mbi deklaratën e fundit të Kryeministrit, se do të merrnin automatikisht shtetësinë shqiptare të gjithë ata që investonin 100 mijë euro e sipër. Pati nga ata që e cilësuan si “mufkën” e radhës së Berishës, por nuk munguan komentet, se kjo është një lëvizje e dëshpëruar për të thithur para/investime në një kohë kur pas pak më shumë se një viti do të zhvillohen zgjedhjet elektorale, ndërsa arka e shtetit nuk gjendet në kushtet më të mira të mundshme.

Megjithatë, nëse marrim ta analizojmë në kuptimin e parë këtë thirrje, pra që ka qëllim kryesore stimulimin e Investimeve të Huaja Direkte, duhen vlerësuar disa tregues: A është në të vërtetë shtetësia ajo që i pengon të huajt të investojnë në Shqipëri? Aspak. Problemi kryesor i investitorëve të  huaj në Shqipëri është ai i pronës. Madje një pengesë e tillë është ngritur sa e sa herë në raportet e institucioneve ndërkombëtare financiare.

Sapo dikush fillon të investojë, dalin një, dy apo tre pretendentë për pronarë duke i nxjerrë një mijë e një probleme, aq sa ia sjellin shpirtin në majë të hundës. Nëse nuk ndodh kjo, konkurrenca e pandershme do t’i mbysë të “ndershmit”. Madje, për këtë të fundit kemi shembuj të freskët.

Mungesa e të kualifikuarve përmendet gjithashtu gjerësisht në raporte. Vërtetë krahu i punës është ende i lirë në vend, por kompanitë kanë më shumë nevojë për specialistë dhe jo punëtor krahu në një kohë kur teknologjia zhvillohet me hapa të shpejtë.

S.E.