Rama: Do heqim TVSH-në për ilaçet

Vendosja e Tatimi mbi Vlerën e Shtuar mbi ilaçet por edhe mbi disa shërbime të tjera shëndetësore kanë rritur edhe më tepër koston e kurimit për të sëmurët në vend. Kreu i PS-së, Edi Rama pretendon se kjo kosto shtesë është 4 mijë lekë në muaj për çdo të sëmurë. Në këtë kuadër, PS merre përsipër që të heqë TVSH-në mbi ilaçet sapo ajo të vijë në pushtet. Premtimi u bë sot nga Rama gjatë mbajtjes së Tryezës për Shëndetësinë. “Sot flasim për një shëndetësi që bazohet në parimin secili për vetë dhe Zoti për të gjithë, politika jonë është secili bazohet sipas mundësive dhe shteti për të gjithë. Sot 60 % e përbëjnë pagesat për qytetarë.. Kontributet përbëjnë 1/5 e shëndetësisë. Në përgjithësi kemi sistem shëndetësor ku më shumë se gjysma e shpenzimeve përbëhet nga pagesat për shtetin. Sepse modeli dhe politika që e mban atë në këmbë janë të ndërtuar mbi parimin secili për vete dhe Zoti për të gjithë”, - tha ai.

Më pas, Rama kalon tek politikat sociale (duke ndjekur deri diku edhe shembullin e Obamës) kur shpjegon se rreth 1 milionë shqiptarë janë të përjashtuar nga shërbimet spitalore pasi nuk kanë një punë, rrjedhimisht nuk janë të siguruar edhe për pasojë nuk mund të marrin shërbime në spitale publike!

Kështu funksionon në teori, por me sa duket Rama nuk ka shkuar sëafërmi në spitalet e vendit ose dhe kur ka shkuar, e kanë pritur si “kryetarin e opozitës” tani apo “kreun e bashkisë” dikur. Sepse, për të vërtetuar që ke paguar sigurimet duhet të plotësosh më parë një mal me dokumente, krahas kësaj, çdokush që bën një vizitë sot në spital nuk pyetet nëse i ka paguar apo jo sigurimet, por duhet të lerë bakshishin tek mjeku, rroga mujore e të cilit vërtitet tek 50 mijë lekë në një kohë kur i është dashur të studiojë minimumi 7 vjet për të mbërritur aty. Edhe nëse ke librezën me vete duhet të sorollatesh nëpër korridore deri sa të marrësh shërbimin.

Shëndetësia ishte një ndër prioritetet edhe të kësaj mazhorance para se të vinte në pushtet, por ministria e linjës u kthye në një mjet pazari në shërbim të krijimit të mazhorancës parlamentare. Fundja, Berisha ruajti të njëjtën trashëgimi në lidhje me Ministrinë e Shëndetësisë pasi edhe socialistët e ofronin për aleatët, kurse Rama mund ta rregullojë të gjithë ketë duke e hequr fillimisht sektorin e shëndetësisë nga tavolina e pazareve politike me aleatët.

S.E.