Tavo: Jo zgjedhje të parakohshme, por LSI-ja këmbëngul për një president konsensual

Në emisionin e mbrëmshëm Pro & Kundër në Ora News, Vangjel Tavo, Nënkryetari i Kuvendit të Shqipërisë dhe deputet i LSI-së, deklaroi se zgjedhjet e parakohshme do ta dëmtonin shansin e Shqipërisë për të marrë këtë vit statusin e vendit kandidat për në BE. Zgjedhjet e parakohshme, sipas kushtetutës, zhvillohen 45 ditë pas raundit të 5-të të votimit për Presidentin e Republikës, në qoftë se asnjë kandidat nuk merr dot të paktën 71 vota në Kuvendin e Shqipërisë. Pra, përkthimi i deklaratës së Tavos është se LSI-ja nuk do ta bojkotojë votimin për President të Republikës, edhe në qoftë se nuk arrihet marrëveshje paraprake për një president konsensual.

Por çdo të bëjë LSI-ja në qoftë se Berisha këmbëngul për një president të dalë nga udhëheqja e lartë e PD-së? Sipas Tavos, LSI-ja është një parti që nuk i prish marrëveshjet, por do të mbajë qendrimin e vet politik në qoftë se PD-ja e prish marrëveshjen e bashkëqeverisjes me LSI-në. Kujtojmë se një nga pikat e asaj marrëveshjeje parashikon bashkëpunimin e dy partive në përzgjedhjen e kandidaturës për President të Republikës.

Kur u pyet drejtëpërdrejt nëse LSI-ja do t’i bashkohet një mocioni mosbesimi ndaj Berishës, në qoftë se ky i fundit nuk pranon zgjedhjen e një presidenti konsensual, Tavo tha se LSI-ja do të bëjë përpjekjet maksimale që të arrihet në një president konsensual, sepse kjo do t’i rriste shumë shanset e marrjes së statusit të vendit kandidat për Shqipërinë. Por, shtoi ai, në qoftë se kjo gjë nuk arrihet, LSI-ja do ta rishikojë pozicionin e saj.

Përkthimi: Në qoftë se Berisha nuk pranon një president konsensual, gjasat janë të mëdha që LSI-ja, pasi të mbyllet kapitulli i zgjedhjes së presidentit, të votojë në Kuvend për rrëzimin e qeverisë Berisha dhe krijimin e një qeverie të majtë.

E.Zaloshnja