Letra e Fules dhe tërheqja e Berishës prej ‘ekstremizmit presidencial’

Komisioneri për Zgjerimin, Stefan Fule, u ka dërguar një letër të shkurtër Berishës e Ramës (më të shkurtër se sa letra e Kadaresë për studentët e Shkodrës), ku u kërkon të merren vesh për gjërat që kanë rënë dakord, mes të cilave dhe për Presidentin. Madje, për këtë qëllim do dërgojë dhe Sannino-n në Tiranë, por me shpresën se drejtori i vet do t’i gjejë të zgjidhura këto çështje.

Menjëherë pas letrës, Berisha ka filluar të bëhet konstruktiv. Duket se ka hequr dorë nga Zaganjori. Po për takimin me Ramën? Ka  kthyer pllakë edhe për këtë çështje; tha krejt papritur nga Vlora se “me Ramën mund të takohet në çdo moment” (madje, të gjitha të përditshmet thonë se ky takim do bëhet nesër, të dielën).

Është hera e parë që Berisha po tërhiqet në marrëdhëniet me opozitën qysh prej vitit 2005. U tërhoq nga Topalli, u tërhoq nga ideja se “Presidenti do jetë një nga eksponentët e PD-së”, u tërhoq nga ideja e mëpastajme se “Presidenti do dalë nga marrëveshja PD-LSI”, dhe së fundmi u tërhoq nga ideja se “me Ramën nuk takohem”.

M.N.