Kanë nxjerrë në shitje apartamentet prej diskos; policia nuk ndërhyn

Në programet informative të televizionit Top-channel flitet për një disko në katin e parë të një pallati në Tiranë, për shkak të së cilës banorët e pallatit kanë nxjerrë shtëpitë në shitje. Nuk jepet emri i diskos, vendndodhja e emri i të zotit të saj (duhet të jetë e ndonjë ‘të forti’?), por shqetësimet e banorëve janë të qarta. “Nuk fle dot në shtëpi. Një fqinji im u largua sepse nuk rrinte dot më. Disa janë të moshuar, disa kanë fëmijë të vegjël dhe nuk mund të vësh për të fjetur fëmijën kur dhoma tronditet nga zhurma”, shprehet një nga banorët. Ndërsa një tjetër thotë: “Ka banorë që shkojnë në shtëpi të të afërmve për të bërë gjumin rehat”. Dhe plot mirëkuptim thotë: “Nuk duam që të mbyllet lokali, por të rregullojë kushtet sepse më parë i ka pasur dhe nuk na krijonte shqetësim”.

Më skandalozja është se kanë lajmëruar policinë e rendit dhe atë bashkiake, por asgjë nuk ka ndodhur. Sa raste të tjera të tilla mund të ketë në Tiranë?

Re.Pu.