Gjergj Ndreca bën parti; Kërcënon shtetarë dhe gazetarë

Gjergj Ndreca ka marrë zemër! Për të gjithë ata që nuk e njohin, Gjergj Ndreca ishte “star-i” (për disa ditë) i mediave pas goditjes së deputetit të PD-së, Ilir Rusmali, apo avokatit Agim Tirana. Prej disa muajsh, Gjergj Ndreca bashkë me “grupin e dhunës” po përjetojnë triumfin e tyre nisur edhe nga mediatizimi që iu bë këtyre incidenteve të rralla në llojin e tyre, por edhe scoop-it që përbënin.

Tashmë Gjergji po del hapur, dërgon shkrime nëpër redaksi gazetash, madje kërcënon me vendosje bombe nëse nuk ia botojnë. Një shfaqje e tillë ka ndodhur pak ditë më parë në redaksinë e së përditshmes 'Shekulli', gjë e cila iu konfirmua “Respublica-s” nga burimet e saj. Burimet vijojnë më tej duke thënë se “kërcënimi i Gjergjit nuk u mor shumë seriozisht, duke njohur personazhin”.

Por Gjergji shkon edhe më tej. Sot “Shqip” i ka kushtuar një faqe shkrim, ku kërcënon edhe shtetarët duke thënë se “do t’i gjymtojnë”. Duket se fama i ka bërë keq. Megjithatë, Gjergj Ndreca dhe “grupi i dhunës” kanë menduar ta kapitalizojnë famën dhe vëmendjen mediatike, në një parti politike! Po, po, parti politike. Do të quhet: Levizja e të Burgosurve Politikë.

S.E.