Berisha në botimin e vjetër: Do mbështes një personalitet të PD-së

Që Fatos Nano nuk ka marrë atë që priste nga Sali Berisha,  kjo u mor vesh në orën 15.10, kur ai doli më shpejt se sa pritej nga takimi, dhe kur iku pa u takuar me gazetarët. Por në njoftimin e dalë nga kryeministria lidhur me këtë takim (është një njoftim më i gjatë se sa duhej), të bën përshtypje qëndrimi i Berishës; qëndrimi i Berishës, jo ndaj Nanos, por ndaj momentit presidencial. Ja ç’thuhet nga spin doctor-ët e kryeministrit (në fakt është po ky vetë, hëm doctor, hëm spin): “Kryeministri theksoi,  se qëndrimi i bërë tashmë publik në mënyrë të përsëritur prej tij ndaj kandidaturës së zotit Nano për President të Republikës, ka lidhje tërësisht me spektrin politik, detyrimet që rrjedhin nga përkatësitë e ndryshme në këtë spektër dhe se ai mbështet dhe do të mbështesë një personalitet të shquar të Partisë Demokratike në postin e Presidentit të Republikës.”

Paska ndryshuar mendje! Është kthyer në pozicionin e tij të fillimit, nja gjashtë a shtatë muaj më parë, kur Topalli nanurisej me ëndërrën presidenciale. Qyqja ajo! Do të fillojë të nanuriset sërish pas kësaj deklarate. Por do ta ketë kot.

M.N.