Berisha i rikthehet diplomacisë së toneve të forta me Serbinë

Prej kohësh që s’mbahen mend qeveria ‘Berisha’ është dalluar për diplomacinë e toneve pajtuese e konstruktive në marrëdhëniet dy e shumë palëshe në rajon, e për këtë gjë është përshëndetur e duartrokitur nga diplomacia e fuqive të mëdha. Sot ka zgjedhur një gjuhë tjetër, teksa ka reaguar lidhur me ngjarjen në Luginën e Preshevës, ku policia serbe ka bërë bastisje e arrestime shqiptarësh në një klimë të zgjedhore. Akti duket i rëndë, dhe i pashpjegueshëm, por bie në sy se gjuha e qeverisë sonë është në kundërshtim me stilin e deritashëm kameratesk, dmth është me tone denoncuese e me përcaktorë të zgjedhur me një funksion pickues. “Akte primitive, dhunë zyrtare, falangat serbe, terror policesk, qëllime të ulta, etj”, janë disa nga frazat e zgjedhura me kujdes e qëllimisht nga diplomacia e Berishës. Madje, kush njeh mirë Berishën vetë, e ka të lehtë të kuptojë se kjo deklaratë është e bërë prej tij personalisht. Ja një pjesë e tekstit: “Qeveria Shqiptare u bën thirrje shqiptarëve në të tri komunat… të dënojnë me votën e tyre aktet primitive të dhunës zyrtare të ushtruar nga autoritet e Beogradit. Qeveria Shqiptare dënon me ashpërsi arrestimet, keqtrajtimet, bastisjet e shqiptarëve nga falangat serbe në Luginën e Preshevës, ditën e heshtjes elektorale, si një akt terrori policesk, me qëllime të ulëta politike. Qeveria mbështet plotësisht deklaratën e këshillave komunale të tre komunave të Luginës së Preshevës për këto akte të shëmtuara të autoriteteve të Beogradit që, me dhunë dhe terror, duan të pengojnë shqiptarët të zgjedhin përfaqësuesit e tyre.”

Re.Pu.