Rehabilitohet plotësisht Agron Duka

Agron Duka ishte ministri i bujqësisë në qeverinë e fundit socialiste dhe një nga të shënjestruarit e përditshëm të sulmeve të Berishës para vitit 2005. Ai quhej prej këtij të fundit “Duka i Krimit”, “Kreu i Klanit të Zemunit” etj. Mendja ta donte atëhere se Berisha kishte dijeni për shumë krime që kishte kryer Agron Duka, dhe se, sa të vinte në pushtet, do ta kallzonte në prokurori për krimet e kryera. Por ç’ndodhi në fakt? Agron Duka vazhdoi i qetë të drejtojë biznesin e tij, ndërsa i vëllai vazhdoi të drejtojë Federatën e Futbollit Shqiptar. Ndërkohë, Agron Duka u aktivizua në fushatat elektroale të PS-së në Durrës, duke mos garuar vetë, por duke ndihmuar kandidatët lokalë socialistë. Pse, pra Berisha, nuk bëri ndonjë kallzim penal për “Dukën e Krimit”? Ndoshta sepse akuzat që bënte atëhere ishin thjesht akuza në tym…

Sidoqoftë, fushata që Berisha bëri atëhere kundër Agron Dukës duket se do të ketë ndikuar deri më sot për mosaktivizimin e Dukës nga PS-ja në fushata të nivelit kombëtar. Por sot, në tryezën kombëtare të PS-së për zhvillimin rural, Agron Duka ishte përbri Edi Ramës dhe dukej qartazi se ishte organizatori i tryezës. Përveç Ramës dhe Dukës në tryezën qendrore, ishte edhe Sekretari i Përgjithshëm i PS-së, Gramoz Ruçi, dhe Sekretari i Programit, Ilir Beqja.

E.Zaloshnja