Panik i qeverisë përballë emergjencës nacionale, dhe Nishani që verifikon telefonatat!!??

Ministri i Brendshëm, Bujar Nishani, ka qenë i ftuar në programin e Babaramos, dhe biseda, siç është e kuptueshme, është vërtitur rreth emergjencës nacionale për shkak të motit. Vihet re një panik tek njerëzit e qeverisë, dhe nuk merret vesh pse (ndoshta për ndonjë kompleks faji në këtë situatë?). Është paniku i kryeministrit (mbajti një fjalim dje në komitetin e emergjencave kundër të parit të socialistëve, dhe si leitmotiv ishte vdekja e qëndrimi ndaj saj; dukej që ish i trazuar), që përcillet tek të tjerët.

Por kthehemi tek Nishani, i cili bëri, përveç të tjerash një deklaratë që ka nevojë për shpjegim: “Për situatën e krijuar nga bora ka pasur dhe janë verifikuar telefonata false nga kafenetë e Tiranës. Është krijuar një situatë alarmante false, se gjoja janë banorë të izoluar në veri”. Nga e di Nishani që janë false? Ç’do të thotë “janë verifikuar telefonata”? Si janë verifikuar?

E pastaj, pse duhet të shqetësohet nga drama që përcjellin këto telefonata, ndërkohë që drama që duket është ku e ku më e madhe sa na e thonë telefonatat?

M.N.