Kryeministria ndërhyrje moderne në fasadën e projektit të 1930-ës. Ministria e Kulturës jep lejen pasi kishin filluar punimet

A mund të cilësohet kjo dhe si arroganca e shtetit në qendër të kryeqytetit? Tanimë që është bërë fakt i kryer, po. Godina e Kryeministrisë do të pësojë ndryshime në fasadën e saj. Edhe pse është monument kulture i kategorisë së dytë, qeveria nuk është ndalur të bëjë atë që i pëlqen. “Gazeta Shqiptare” raporton se punimet për ndryshimet kanë filluar ditë më parë, ndërsa projekti ka kaluar në Këshillin Kombëtar të Restaurimit pranë Ministrisë së Kulturës, vetëm ditën e premte, datë 3 korrik. Në fasadën e saj, me pamje nga bulevardi, do të ndërtohet një strehë e gjerë, e mbushur me drita. Nga projekti, ajo duket tejet moderne për projektin e 1930­ës me të cilin u ngrit në këmbë godina. Në mos i merr ‘frymën’, ky volum i ri ndërhyn në imazhin e krijuar e të ruajtur ndër vite të ngrehinës monument. “Do jetë një hyrje e re për në Kryeministri, mbi të cilin do të ketë një volum të ri në formë strehe. Autori i saj, një skulptor i huaj, e ka parë këtë si vepër artistike. Praktikisht do të jenë dy skulptura, kjo përpara me pamje nga bulevardi dhe një skulpturë tjetër, moderne që sjell një përqafim, në oborrin e pasmë të Kryeministrisë”, – tha një burim nga KKR për “Gazeta Shqiptare”. I pyetur nëse për çështjen pati debate apo kaloi menjëherë, burimi sqaroi se pati një diskutim, por në fund projekti u kalua, pasi u arrit në përfundimin se ndërhyrja nuk e cenon monumentin, duke qenë se është një pjesë që nuk futet organikisht në monument. Por, mbase asgjë nuk ka vlerë tani kur punimet po mbarojnë me miratimin e Ministrisë së Kulturës. Me këtë ndërhyrje, i hapet rruga çdo transformimi që monumentet e kulturës duan të bëjnë nga jashtë dhe askush nuk mundet ta pengojë.