Pirro Dhimës i vjen në ndihmë e kaluara për të zgjedhur mes demokracisë dhe bukës: Mos e shqiptarizoni Greqinë, thoni “po” propozimeve të kreditorëve

Sipas Pirro Dhimës eksperienca e tij jetësore mund t’u vlejë grekëve për të refuzuar qeverinë e Aleksis Cipras në vendimin për të kundërshtuar planin e kreditorëve ndërkombëtarë. Në një postim në facebook, kampioni olimpik nga Himara ka hequr një paralele mes asaj që mund të ndodhë nëse Greqia del nga euro dhe Shqipërisë komuniste. Ai beson se demokracia ekziston përderisa ai është I lirë të thotë atë që mendon, por i bën thirrje shoqërisë greke të mos shqiptarizohet dhe të mos përjetojë kohën e tollonave dhe kuponave që ai vetë i ka jetuar gjatë kohës kur u rrit në Shqipëri.

Ja postimi i kampionit olimpik që ka qenë edhe deputet i PASOK-ut

“Jam kritikuar sepse kam zgjedhur të jem i hapur për ato që besoj (dhe kjo zonja dhe zotërinj është demokracia). Më thanë se jam shqiptar dhe nuk kam të drejtë të flas. Po unë jam rritur në Shqipëri. Dhe nga ajo çfarë ka jetuar atje refuzoj shqiptarizimin  e shoqërisë greke. Refuzoj që fëmijët tanë të rrijnë në radhë për 1 kg djath, 10 vezë apo 60 gram mishë të grirë(ngado që ai vjen), refuzoj të rrimë çdo muaj me 1 kupon në dorë siç ndenjta unë. Refuzoj që fëmijët tanë të rriten me një Enver Hoxha mbi kokën e tyre dhe frikë në shpirt.  Shumica prej jush që më shajnë për tradhëti dhe të tilla ekstremitete nuk e keni jetuar, shpresoj ta fantazoni, por të mos e jetoni kurrë atë që jetova unë”