Kur antiligji të tregon ligjin

Kush beson se një vend duhet të përfaqësohet nga vlerat më të mira në drejtimin e institucioneve publike, ka gjetur vendin më të gabuar në Shqipëri. Dhe nuk do shumë mund e djersë për ta gjetur këtë. Mjafton që ditët e fundit të verifikosh një emër që për shumëkush mbase është harruar dhe nuk tregon asgjë. Bëhet fjalë për Drejtorin e Inspektoriatit Urbanistik Kombëtar (INUK), Dem Dollapin. Ditët e fundit ai është shfaqur shpesh nëpër ekranet televizive me aksionet që ka ndërmarrë për të çelur një segment të ri rrugor në zonën e Saukut, pjesë e të ashtuquajturës autostrada e re, Tiranë-Elbasan.

Mjaftuan pra dy-tri kronika televizive, shfaqja e emrit të këtij personazhi në median audiovizive dhe atë të shkruar, që redaksitë të hynin në shfletimin e arkivave të tyre e të gjenin fotografi se çfarë përfaqëson ky drejtues i lartë, që vjen në atë detyrë vetëm me propozim të ministrit të linjës dhe miratim të Kryeministrit! E pra, e kaluara jo fort e largët na tregon një personazh me pantallona të zeza e bluzë të bardhë, që “rastësisht” gjendet në oborrin e kryeministrisë, pas shpinës të të cilit janë dy autovetura në flakë. Bëhet fjalë për trazirat e 13-14 shtatorit 1998, ku kreu aktual i INUK-ut ishte një nga protagonistët në atë sulm me armë e molotovë për të marrë Kryeministrinë.

Dhe vjen një ditë që ky “trim” shpërblehet për “meritat” e tij. Por çfarë mbetet për atë intelektualin e thjeshtë që ka mbaruar shkëlqyeshëm, brenda apo jashtë vendit, që ka kualifikime pafund, tituj shkencorë, i cili tek sheh këto dy pamje, Demën e 1998-ës dhe Dollapin e 2011-ës, e humb përfundimisht besimin tek ky vend?! Si mund të pranohet nga kushdo që i ka shërbyer këtij vendi me nder dhe përkushtim që në krye të një institucioni që, siç thashë, emërohesh vetëm me firmën e Kryeministrit, të qëndrojë një personazh që vjen nga rruga e që duhet të shërbente vetëm si modeli i turpit?!

Jo zotërinj ministra, që propozoni këto personazhe! Jo zoti Kryeministër, që i miratoni ato! Kjo nuk është Shqipëria ime, kjo nuk është administrata ku unë duhet të besoj! Ky është modeli juaj që po na e impononi përdhunshëm edhe neve nëpërmjet ekraneve…. Edhe atyre banorëve që kreu i INUK-ut u tregon ligjin, ndërkohë që është vet një ligjshkelës.

Nëse ju ka mbetur qoftë edhe ndopak cipë nga cipëplasja, hiqeni sa më shpejt atë turp nga drejtimi i atij institucioni. Nëse nuk e bëni, atëherë nuk është më faji i Demës që rri aty, por përnjimend i yni që e lejojmë atë të na trokasë tek dera me fadroma e të na tregojë (anti)ligjin…..