Berisha: Rama është kundër rrugës Durrës-Kukës. Rama: Akuzë e ndyrë e shpifje perverse

Një artikull i shkruar nga një italian e i publikuar në rrjetet sociale, në të cilin vizatohet si jo efektiv investimi në rrugën Durrës-Kukës, e ka shqetësuar Berishën deri në atë pikë, sa ka urdhëruar zëdhënësen të dalë e të këndojë avazin e njohur, sipas të cilit “Edi Rama ka thënë që kjo rrugë është rruga e asgjësë, rrugë e panevojshme, apo edhe rrënimi i shqiptarëve”. Është e n-ta herë që Berisha i bën këtë akuzë, dhe është e n-ta herë që Rama i bën përgënjeshtrim të qartë e të fortë. “Akuzë e ndyrë nga selia e PD-së ndaj meje e PS-së për Rrugën e Kombit! Shpifje perverse e pushtetit hajdut që vodhi zgjedhjet për të vjedhur vendin”. Dhe më poshtë vijon: “Shitësit e detit, vjedhësit e zgjedhjeve, vrasësit e protestuesve, kusarët e Shqipërisë s’na bëjnë dot moral patriotik! Janë tradhtarë! Pikë”.

Kjo ‘hidh e prit’ duket si trailer që vazhdon pa fund. Berisha nuk ka ndërmend të heqë dorë nga shpifja, por dhe Rama nuk ka ndërmend të heqë dorë nga përgënjeshtrimi. Për Ramën është i rëndësishëm, me sa duket, mendimi i atyre që për rrugën kanë një mendim të mirë.

E.G.