Si mund të bëhet korrigjimi proporcional kombëtar i sistemit aktual zgjedhor?

Tryeza e opozitës e mbledhur për herë të parë sot për vitin 2012, ka diskutuar mbi reformën zgjedhore, duke tentuar të shkojë drejt propozimeve të përbashkëta. Në gati dy orë diskutime, krerët e partive të vogla opozitare, së bashku me kreun e PS-së Edi Rama, kanë shqyrtuar idetë dhe formulat për një përmirësim të Kodit Zgjedhor. Pas takimit, Preç Zogaj deklaroi se opozita do të ngulmojë për ndryshimin e sistemit zgjedhor, duke theksuar nevojën e korrigjimit proporcional kombëtar të sistemit aktual zgjedhor.

Në fakt, për këtë korigjim, ka kohë që flitet nga politikanët, por ende nuk janë dhënë detaje. Më poshtë po jap një version të ndryshimit të kodit zgjedhor që mund ta realizojë këtë korrigjim, pa ndryshuar kushtetutën.

Në nenin 163 të kodit zgjedhor mund të shtohet pika 5 si vijon: “Pasi ka përfunduar shpërndarja e 128 mandateve të para sipas nenit paraardhës, fillon përllogaritja për shpërndarjen e 12 mandateve të tjera. Numri total i votave të vlefshme në rang kombëtar pjestohet me numrin 140 të mandateve të Kuvendit, për të përcaktuar numrin e votave që përfaqësojnë një mandat në rang kombëtar. Ky numër përdoret si pjesëtues i numrit të votave që ka marrë çdo parti politike në rang kombëtar, për të llogaritur numrin e mandateve në rang kombëtar. Partive politike që kanë përfituar më pak mandate se sa i është llogaritur në bazë të llogaritjeve të nenit 162 të këtij Kodi dhe të këtij neni, u jepet diferenca e mandateve, duke u dhënë preferencë partive që kanë më shumë vota në rang kombëtar, të papërkthyera në mandate në raundin e parë të shpërndarjes. Shërndarja e 12 mandateve të fundit në zonat zgjedhore bëhet sipas qarqeve ku partitë politike kanë marrë më shumë vota.”

Ky ndryshim parashikon që ndarja e 128 mandateve të bëhet sipas formulës aktuale për çdo qark dhe 12 të përdoren për korigjim proporcional kombëtar. Në qoftë se duam një korigjim më të fortë, mund të përdorim skemën 116+24 në vend të skemës 128+12, por në këtë rast, do t’u krijohej mundësia për t'u futur në parlament edhe partive fare të vogla.

E.Zaloshnja