Kryeministri merr nën varësi 4 institucione të reja

Në mbledhjen e djeshme të Qeverisë, Kryeministri Berisha ka marrë nën kontroll personal 4 institucione që më parë ishin në varësi të Këshillit të Ministrave. Institucionet që kalojnë në varësi të kryeministrit janë Drejtoria e Sigurimit të Informacionit të Klasifikuar, Agjencia e Kërkimit, Teknologjisë dhe Inovacionit, Komisioni i Prokurimit Publik, dhe Instituti i Statistikave.

Ndryshimi thelbësor në këtë vendim të marrë është se më parë këto institucione vareshin nga Këshilli i Ministrave dhe vendimet në lidhje me to duhet të merreshin në mënyrë kolegjiale nga të gjithë ministrat, kurse tashmë do të jetë kryeministri ai që do të kontrollojë individualisht këto sektorë të administratës shtetërore.

Bie në sy që vendimet krijojnë kontroll parësor mbi informacionin. Kryeministri do të ketë tashmë nën kontroll personal institucionin më të madh të statistikave në vend, si edhe Drejtorinë e Sigurimit të Informacionit të Klasifikuar, drejtori që do të përcaktojë se cili informacion mbi veprimtarinë edhe të vetë Kryeministrit është ‘sekret’, çka do të thotë kontroll mbi lirinë e informimit të publikut.

Marrja e mbikëqyrjes së Komisionit të Prokurimit Publik, pikë ku veprimtaria e Këshillit të Ministrave ka qenë përherë e atakueshme, nuk ka nevojë për shumë komente.

I vetmi vendim emocional, duket se është ai për të marrë kontroll individual mbi Agjencinë e Kërkimit, Teknologjisë dhe Inovacionit, agjensi që i kujton ‘marrëdhënien e vet të hershme’ me Steve Jobsin.

K. Cukali