Ettore Sequi “in love with Albania”

Në një libër të diplomatit italian të njohur si peacekeeper, Andrea Angeli-t, ndërsa flitet për Afganistanin, përmendet si rastësisht Shqipëria. Dhe përmendet në mënyrën më të pabesueshme. Autori i librit me titull Senza Pace rrëfen se ish ftuar në rezidencën e ambasadorit italian në Kabul, dhe ndërsa përshkruan sallën ku ishin ulur për të darkuar nja 30 vetë, pasi flet për mbulesën e tryezës të bërë nga duar afganesh, thotë se në mure syri të zinte ca maska veneciane të bëra nga artizani i shkëlqyer shkodran Edmond Agoni. Maska veneciane të bëra nga duar e mendje shkodranësh, që gjenden diku në Kabul? Po, po, është tamam kështu. Dhe nuk ka asgjë për t’u çuditur, pasi ambasadori italian në Kabul e ka emrin Ettore Sequi. Ky i fundit ka ardhur në Shqipëri pasi ka shërbyer për disa vite me radhë në Afganistan, fillimisht si ambasador i vendit të tij, e më pas si përfaqësues i BE-së (shef i misionit), Por ka qenë gjithashtu në Shqipëri përpara se të shkonte në Afganistan.

Andrea Angeli i dedikon një kapitull të tërë pikërisht ambasadorit të BE-së në Tiranë, Ettore Sequi-t, të cilin e përshkruan si një diplomat brilant. Shqiptarëve u duhet ende të binden për këtë. Por një provë “luajaliteti” me shqiptarët e ka dhënë, ndërkohë: maskat veneciane “made in Scutari” i ka bartur me mijra kilometra larg për të zbukuruar muret e sallonit të pritjes së rezidencës së vet.

E.G.