Dashnor i fjalës së lirë apo i dashuruar me fjalën e lirë?

Kryeministri Sali Berisha! Dashnor i fjalës së lirë! Mallëngjyese apo jo? Mund të prekesh, të magjepsesh, bile mund të biesh edhe në dashuri me shprehjen “dashnor i fjalës së lirë”. Por e thënë nga Berisha, ka diçka sugjestionuese kjo shprehje, diçka që nuk më lejon t’i bëj një “like” dhe të kaloj tek shprehja tjetërxhevahire e radhës, diçka që nuk më lejon thjesht të flirtoj me të, por më nxit të zhytem në detin e thellë të metaforës së dashurisë. Aty ku, përveç dashnorëve karizmatikë të fjalës së lirë, notojnë edhe flirtues, edhe tundues, edhe të dashuruar, edhe përdhunues të saj...E tillë është fjala e lirë. I lejon të gjithë ta rrokin atë. Në mënyrën e tyre!

A është Berisha dashnor i fjalës së lirë? Pse Berisha përdori fjalën  “dashnor” për të cilësuar raportin e tij me fjalën e lirë? Pse “dashnor i fjalës së lirë” dhe jo “i dashuruar me fjalën e lirë”? Berisha është njohës i mirë i nuancave semantike të fjalës dhe sidomos i efekteve që synon të arrijë nëpërmjet fjalës. Siç e ka thënë dhe vetë, mund të kishte qenë edhe poet...Dhe ja që poeti i fjetur brenda qënies së tij, në harmoni me politikanin,  vendosi për “dashnor” dhe jo “i dashuruar me fjalën e lirë”. Dhe jo rastësisht. Berisha e njeh mirë veten dhe atë burrin malësor që i rri përherë zgjuar brenda vetes. Berisha e njeh fort mirë atë hiperaktivitetin që shprehfjala “dashnor”, të cilin nuk e gjen tek “i dashuruari”? Thua të mos e dijë Berisha se, tek “dashnori”, mungon ai reciprociteti që duhej të ekzistonte tek raporti midis dy të dashuruarve? S’e besoj! Kush më mirë se Berisha e di se tek dashnori i fjalës së lirë fle(t) ai burri i shtetit që e ka bërë zap fjalën e lirë, që nuk e lë aspak të lirë dhe që nuk i intereson aspak të dijë se çfarë mendon fjala e lirë për të? S’e besoj që Berisha nuk e ditka se ka diçka prej pronari tek dashnori i fjalës së lirë (kujtoni që gjenitivi shpreh pronësi), i cili mendon se me fjalën e lirë mund të bëjë çfarë i don qejfi: ta përdorë për të flirtuar me kundërshtarët e rivalit dhe njëkohësisht për ta përdhunuar psikologjikisht kundërshtarin me gjithë familje.Besoj se Berisha e njeh forcën prej hamshori zaptues që zien tek dashnori i fjalës së lirë, energji të cilën nuk e gjen tek i dashuruari pas fjalës së lirë. Sepse kush dashuron fjalën e lirë, dashuron pa e zotëruar atë kurrë plotësisht.Bile unë besoj se askush më mirë se Berisha s’e di që tek dashnori i fjalës së lirë ka diçka prej kalorësi të stërvitur që në fëmijëri,i cili,pasi e ka lodhur e zbutur fjalën e lirë, i ka asaj dhe e nget dhunshëm  nga t’i dojë kokrra e qejfit. Jo vetëm kaq, por unë besoj Berisha e di se tek dashnori i fjalës së lirë ka edhe diçka prej atij dashnorit të skenave filmike klishè, ku aktori e përkëdhel, e puth egërsisht dhe e rreh të dashurën e më pas, si një dashnor i vërtetë, e hedh në krevat dhe i hidhet edhe vetë përsipër. Dhe së fundi, besoj se Berisha e di krejt mirë se ka edhe diçka prej përdhunuesi tek dashnori i fjalës së lirë, i cili beson se tek dhimbja qëndron kënaqësia e vërtetë.

Në këtë kuptim Berisha është më i sinqertë se asnjëherë kur vetëquhet si dashnor i mediave dhe i fjalës së lirë. Por nuk është i vetmi dashnor i fjalës së lirë në këtë vend!Teatri i politikës shqiptare është mbushur me dashnorë mediash, me dashnorë të fjalës së lirë, me flirtues, me tundues e përdhunues të fjalës së lirë, të cilën fjalën e lirë e konsiderojnë si e drejta për të shpërndarë,pa u ndëshkuar, në hapsirë budallallëqe dhe ligësi. Ka kohë që spektatorët e këtij teatri, pra ne, presim që në skenë të ngjiten të dashuruarit me fjalën e lirë. Por druaj se nuk kemi pse ta presim nga politika të dashuruarin me fjalën e lirë. Nuk është politika shtrati ku lindin dhe rriten të dashuruarit me fjalën e lirë! Adrenalina e pushtetit nuk lë vend për adrenalinën e dashurisë me fjalën e lirë. Pushteti (ai politiknë fakt) i takon atij që e zotëron (në kuptimin e zaptimit)  fjalën dhe kanalet e saj të komunikimit. Pushtetin mund ta gëzojnë vetëm dashnorët e fjalës së lirë. Prandaj le t’i lëmë dashnorët, flirtuesit, tunduesit, përdhunuesit e fjalës së lirë në krahët e adrenalinës së pushtetit, dhe të shijojmëqetësisht kënaqësinë e asaj fjalës së lirë që na ndihmon ta takojmë e ta rrokim Tjetrin që mendon ndryshe. Pa e pushtuar atë asnjëherë!