Teuta Hoxha: libri ‘Enver Hoxha’ i shkruar nga një prej të mundurve

Teuta Hoxha, nusja e djalit të Enver Hoxhës, Ilirit, ka reaguar sot në një intervistë të gjatë për ‘Gazeta Shqiptare’ duke e quajtur librin-biografi të Blendi Fevziut për diktatorin ‘palo libër”. Veç faktit se ky është reagimi i parë kundërshtues i biografisë ‘Enver Hoxha’ të sapodalë në treg dhe që ka thyer të gjitha rekordet e shitjeve të pas viteve ’90 në Shqipëri, bie në sy edhe klasifikimi që e reja e familjes Hoxha i bën Fevziut. “Ai është nga pala e të mundurve”, thotë ajo për moderatorin e ‘Opinionit’ duke iu referuar rendit të ri që u vendos pas Luftës së Dytë Botërore në Shqipëri përmes luftës së klasave. Sipas Teuta Hoxhës, Blendi Fevziu ende bën pjesë në klasën e të mundurve. Më tej, duke u shprehur se është historiane, ajo ndalet edhe te një përimtim “profesional” i tekstit duke thënë se nuk është biografi, por biografi publicistike. Hoxha pretendon se gazetari Fevziu nuk ka patur akses te arkiva e Enver Hoxhës, pasi me sistemimin e kësaj arkive po merret pikërisht ajo. Teuta Hoxha vë në dyshim edhe atë informacion të paktë, siç e quan ajo, që ka përdorur autori i librit duke thënë se në të nuk shfaqet shkrimi i Hoxhës dhe pyet se si nuk janë shfrytëzuar mijëra faqet e kujtimeve personale të vjehrrit të saj. Dje gazetari i ‘The Economist’ Tim Judah e ka quajtur librin ‘Enver Hoxha’ një biografi serioze të diktatorit, tekst i cili me pak fat mund të përkthehet e t’u jepet edhe audiencave të huaja.

H.B.