Maks Velo: Agolli duhet të kërkojë falje; Buzën do doja ta shihja në burg

Maks Velo i përgjigjet Kujtim Buzës me një intervistë të dhënë në të njëjtën gazetë, shqiptarja.com. Intervista është e shoqëruar nga një foto e Enver Hoxhës mes shkrimtarëve e artistëve në daljen e parë të diktatorit pas vdekjes së Mehmet Shehut. “Lidhja ishte një farë kazani, ku ai lante duart pas çdo mëkati”, thotë Velo.

I mëshon idesë së kahershme të tij, se strumbullari i mëkateve në Lidhje kanë qenë Dritëro Agolli e Kujtim Buza. “I pari ka kërkuar t’më takojë”, thotë Velo, “por e kam refuzuar këtë takim përsa kohë ai s’ka kërkuar falje”, ndërsa Kujtim Buzën e konsideron të përfshirë drejtëpërdrejtë në dënimin e tij. “Ai gënjen kur thotë se ka bërë ekspertizën e 10 punëve të mija; kanë qenë gjithsej 248 punë, dhe kjo del nga dokumenti i ekspertizës, ku Buza shkruan e zeza mbi të bardhë se ka parë e vlerësuar 248 punë të mijat”, i kthehet Maks Velo kohës kur e kanë dënuar.

“Do doja ta shihja të bënte aq burg sa kam bërë unë, Oseku dhe Gjergo së bashku, dmth 19 vjet; vetëm në këtë rast do ndihem i çliruar”, shprehet Velo për Buzën. Ndërkohë që pak më përpara nuk kursen as të atin e tij, Abdurrahim Buzën, për të cilin thotë se është mbivlerësuar nga Lidhja, në një kohë që nuk ka qenë piktor modern; ka qenë piktor naiv, popullor”.

Re.Pu.