Kujtim Buza: Oseku, Gjergo, Velo nuk u dënuan për artin e tyre

Piktori Kujtim Buza u përgjigjet akuzave që i janë bërë për rolin e tij si sekretar i Lidhejs së Shkrimtarëve për Artet Figurative në periudhën 1973-1987. E bën këtë me anën e një interviste dhënë Admirina Peçit të së përditshmes shqiptarja.com. Emri i tij është përmendur më së shumti nga Max Velo.

“Kam qenë me fat në këtë jetë që …. kam qenë sekretar i lidhjes së shkrimtarëve”, thotë Buza, dhe nënvizon që gjatë kohës së komunizmit nuk ka patur disidencë. “Po”, thotë ai, “ka patur artistë që përpiqeshin të zgjeronin gamën e krijimtarisë e të shtynin gardhin e rreptë të metodës zyrtare të realizmit socialist (bën një listë në këtë pikë, ku përfshin Gjergon e Osekun, por jo Velon), por nuk ka patur disidentë”. Më poshtë pranon se lidhja ishte levë e partisë, por mohon që personalisht të ketë patur një rol në dënimin e disa artistëve, si Edison Gjergo, Ali Oseku, Max Velo. Më saktë, ai pranon të ketë bërë tok me të tjerë akt-ekspertiza (si në rastin e Max Velos), por nuk e konsideron veten fajtor për këtë gjë.  “Na i sollën në Lidhje”, thotë ai, “dhjetë punime të Velos, dhe na kërkuan ata (‘nuk ish kërkesa jonë”, saktëson) të bënim akt-ekspertizën; ne shkruam ato gjëra që ishin thënë në diskutimet krijuese”.

Ndoshta në këtë intervistë Max Velo mund të gjejë motive për t’iu kthyer dhe njëherë atyre kohëve.

Re.Pu.