Minutat e fundit të Berlusconi-t në politikë: është duke bërë gati dorëheqjen

Silvio Berlusconi nuk ka reshtur së dhëni garanci se nuk ka ndërmend të japë dorëheqje, pasi numrat në parlament janë në favor të tij, por presionet e rritura mbi të të bëjnë të mendosh se këto deklarata kanë qenë thjesht një provë force e një njeriu vanitoz në momente të vështira. Të gjithë e kanë ditur që ai po shkonte drejt tërheqjes, megjithatë. Të vetët po iknin një e nga një. E fundit ishte Gabriella Carlucci, motra e prezantueses së njohur televizive Milly Carlucci. Dje u fol që edhe Letta e Alfano, dy miq-delfinë të tij, i kanë sugjeruar ta tërhiqet.

Sot në mëngjes, zv.kryeredaktori i gazetës Libero, Franco Bechis, shkruante në twitter-in e tij se “ka në dorë lajme të sigurta që thonë se Berlusconi do të japë dorëheqjen para mëngjesit të nesërm”. Dhe lajmin e konfirmon Giuliano Ferrara, i cili është njeriu i duhur për ta dhënë këtë konfermë (Ferrara është për Berlusconi-n si Frangaj & Fevziu për Berishën). Në versionin online të gazetës së tij Il Foglio, Ferrara shkruan se “që Berlusconi do ikë, kjo është një gjë që s’diskutohet më. Madje, ikja e tij është çështje orësh, për t’mos thënë minutash”.

M.N.