Përsëritet Zogu i Zi: Qeveria “anulon” punimet e qendrës

Ka më tepër se një vit që ka filluar rikonstruktimi i qendrës së Tiranës mbi bazën e një projekti të bërë nga një studio ndërkombëtare dhe të miratuar nga Këshilli i Rregullimit të Territorit. Punimet në atë zonë kanë ecur me ritmin e breshkës, duke provokuar një ngadalësim dramatik të trafikut e duke bllokuar pothuaj totalisht magjistralin kryesor të kryeqytetit. Bashkia e Tiranës ka patur pretendimin se e gjitha kjo ka ardhur për shkak të egzekutivit të kryesuar nga Berisha, i cili “ka bllokuar ndërtimin e Unazës së Madhe e të Vogël deri më sot”. Çështja është se qendra e Tiranës mbeti e bllokuar për muaj e muaj me radhë, gjë që mbolli një pakënaqësi që penalizonte bashkinë e Ramës. Dhe sipas shumë gjasave, qytetarët e Tiranës nuk kanë arritur ta kuptojnë mirë këtë pretendim (kush e ka kuptuar?), e nuk është çudi që një pjesë syresh të kenë votuar kundër Ramës në zgjedhjet e fundit edhe për këtë motiv.

Bashkia e Lulzim Bashës ka gjetur një zgjidhje tjetër: po anashkalon projektin. Ajo ka filluar punimet në qendër, por nuk merret vesh se çfarë punimesh janë, mbi bazën e cilit projekt e mbi bazën e cilit vendim të KRRT-së, “Në KRRT nuk ka kaluar asgjë që ka të bëjë me qëndrën”, thotë këshilltari Aldrin Dalipi, i cili më poshtë na bën me dije se do të ketë një denoncim në prokurori lidhur me këtë. Ai lë të nënkuptohet, se është duke u injoruar projekti fillestar i miratuar, dhe po punohet mbi bazën e ndonjë projekti të improvizuar.

Nëse është kështu, atëherë është fjala për një déjà vu të shëmtuar. Ka ndodhur edhe njëherë tjetër një gëj e tillë, me Zogun e Zi, por kjo e qendrës është një ngjarje më spektakolare. Bëhet fjalë për një shumë më të madhe parash që hidhet në erë.

E.G.