Zogaj: Agolli po qesëndis pushtetin!!!

Vëmendja e pushtetit ndaj Dritëro Agollit në ditëlindjen e 80-të të tij ka ngjallur shumë kureshtje e diskutime në mjedisin publik. Nuk qe ndonjë befasi e madhe, pasi ka kohë që vihet re një vardisje e tyre përballë shkrimtarit, të cilin njëherë e një kohë e kanë anatemuar. Madje, që të jemi më të saktë, ka qenë Agolli, i majjti par excellence, që e ka përuruar këtë stinë mirëkuptimi e dashurie, kur në pikun e debatit mbi zgjedhjet problematike në Tiranë ngriti receptorin e telefonit, formoi numrin e Luzim Bashës, dhe i tha këtij të fundit: Urime zoti kryetar i Bashkisë!

Preç Zogaj ka një interpretim të vetin lidhur me këtë ngjarje, sipas të cilit Dritëro Agolli i ka pranuar plot qesëndi të pashprehur këto lajka e hosanara. Në një shkrim të publikuar tek Shekulli, Zogaj thotë se urimi që Agolli i bëri Lulzim Bashës ishte “një gjest sovran  dhe i padëmshëm i shkrimtarit,  që  është tërhequr si Leon Tolstoj në  vetminë e muzgut të  moshës, që  jeton me ëndrrën e tij të paqes kombëtare dhe universale, që ka një huq  plaku në fund të fundit, nese nuk i merren parasysh të tjerat…. Dritëroi, ndërsa nuk ka asnjë  problem t’i lerë  të kënaqen  e të argëtohen me ditëlindjen e tij  delfinët e pushtetit, ka gati në nënqeshjen e tij tipike një ironi  akoma më të madhe për ta: ja si i bëra të spërdridhen vetëm me një urim. Kështu janë këta. Keq e paskan punën!”

Është kështu vërtet? Ndoshta, por nga ana tjetër ka shumë të tjerë që janë të sigurtë për të kundërtën. Janë njerëzit e pushtetit që po tentojnë ta përdorin plot nënqeshje e qesëndi shkrimtarin Dritëro Agolli.

E.G.