Hajde t’i emërtojmë malet!

Kam parë gjithmonë me kureshtje prerjet e ndryshme të Dollarit Amerikan ku, portreti i Ëashingtonit është në kartëmonedhën një dollarëshe dhe ai i B. Franklinit është në atë njëqind dollarëshe; përse është bërë kjo përzgjedhje?

Shtetet e Bashkuara të Amerikës zënë gjysmën e kontinentit me të njëjtin emër, ka pesëdhjetë shtete dhe ka pak ose aspak emërtime rrugësh apo institucionesh me emrat e figurave historike të baballarëve të kombit amerikan. Pothuajse të gjitha rrugët kanë emra drurësh, liqenesh, kodrash, fushash, përrenjsh.

Më shkuan këto nëpër mend kur po dëgjoja Kryeministrin tonë të nderuar, kur i urdhëronte historianët se si ta rishkruajnë historinë e Luftës së Dytë Botërore dhe se si duhej reduktuar emri i Qemal Stafës nga rrugët, shkollat dhe stadiumet.

Unë e mbështes zotin Berisha në këtë pikë. Qemal Stafa dhe personalitet historike si ai, kanë nevojë për një varr madhështor, për një obelisk, për një enciklopedi të shkruar nga historianët dhe gjuhëtarët më të përgjegjshëm të kombit. Ai ka nevojë që "Qortimet e Vjeshtës" të kthehet në një libër xhepi për shkollarët e sotëm.

Por.., por.., por.., Më mundon një pyetje: A ia kanë treguar të nderuarit Kryeministër se në Tiranë, kryqëzimi i rrugës së Kavajës me Unazën e vogël quhet "21 Dhjetori", ditëlindja e Stalinit, se bulevardi për te stacioni i trenit vazhdon të quhet më shumë bulevardi  "Stalin" se sa "Zogu i Parë",  emërtim të cilin ia vunë socialistët?

A e di shkëlqesia e Tij se pallatit të sportit ende vazhdojnë t'i thërrasin më shumë "Partizani" se "A. Rusi" dhe stadiumit "S. Stërmasi " më shumë stadiumi "Dinamo"? Besoj se tiranasit autoktonë, kolegë të doktorit ia kanë shpjeguar se, përse kryqëzimi i rrugës së Durrësit me unazën quhet: "Zogu i Zi".
A ka fuqi zoti Lul Basha me ndihmën e kryeministrit tonë ta zhbëjë këtë emër përpara se të reduktojë emrin e Qemal Stafës?

Së fundi, do t'i bëja një propozim të nderuarit Kryeministër: malet e Shqipërisë të vendosë t'i emërtojë me ato emra personalitetesh që diktatura komuniste i la në harresë: Cukali- Jak Serreqi, Vela- Luigj Bumci, Qafë-Shtama-  Ahmet Zogu, Dajti - Esat Toptani, Gramozi- Safet Butka dhe Shkëlzeni - Azem Hajdari.