Kushtetuesja e Kosovës vendos: Jo shamive në shkolla!

Të shkuarit e vajzave me shami në shkollë do të ndalohet deri kur të vendoset për ndryshimin e Kushtetutës së Kosovës. Aty thuhet qartë se Republika e Kosovës është shtet laik dhe neutral në çështjen e besimeve fetare. Mbi këtë arsyetim është mbështetur edhe vendimi i Gjykatës Kushtetuese të Kosovës e cila ka hedhur poshtë një ankimim të Arjeta Selimit, një vajze nga Vitia, nxënëse në shkollën publike ‘Kuvendi i Lezhës’. Beteja e Arjetës ka zgjatur plot dy vjet, sipas gazetës Koha Ditore, dhe ka përfunduar me humbjen e saj dhe bashkë me të edhe të shumë vajzave si ajo që ndjekin arsimin publik, por dëshirojnë të mbajnë edhe shamitë si shprehje të besimit të tyre. Lëvizja ‘Bashkohu’, një organizatë joqeveritare, nëpërmjet protestave të premteve pas faljes së xhumasë ka kërkuar që shteti të heqë normat që ndalojnë shamitë në shkolla. Protestat e mbajtur deri tani në Prishtinë do të përhapen në qytete të tjera të Kosovës, njofton lëvizja.

H.B.