Ardian Klosit iu dha lamtumira e fundit; e përcollën miq e të afërm

Dy orë zgjatën homazhet pranë trupit të Ardian Klosit në sallën kryesore të Bibliotekës Kombëtare. Më pas të gjithë u nisën drejt varrezave të Sharrës, ku do të prehet Klosi për jetë. Në momentin e lamtumirës ishin mbledhur miq, të njohur e të afërm të tij. Binin në sy njerëz të artit, të shtypit, të kulturës, të politikës, por edhe të tjerë që Danin s’e kanë takuar kurrë në jetën e tyre.

Ceremonia ishte e shkurtër, aq sa mjaftonte për ta mbuluar me dhé në të njëjtin vend ku janë dhe të shtrenjtit e ikur përpara tij nga kjo botë (nëna ish e fundit, para disa muajsh) e për të dëgjuar një fjalë lamtumire. Këtë të fundit e mbajti gazetarja Rudina Xhunga, e cila ishte shumë e emocionuar, teksa lexonte atë që kish përgatitur. Pranë arkivolit ishin vajzat, dhe e shoqja, Jutta Benzenberg. Dhe pranë tyre qëndroi gjatë gjithë kohës Edi Rama, i cili është kujdesur këto dy ditë për shumë detaje të nderimit e të ceremonive të rastit.

E.G.