Provohet falsifikimi i rezultatit të votimit në parlament

Është një skandal i vërtetë ajo që ka ndodhur në parlament në fillim të korrikut, në momentin që po votohej ligji për censusin. Nga lista e deputetëve (kjo listë ka rënë në dorë të eksponentëve të Aleancës Kuq e Zi) që kanë votuar atë ditë, del se kanë qenë të pranishëm edhe deputetët Lefter Maliqi dhe Gëzim Dibra; majde, këta kanë votuar pro ligjit. Mirëpo, kanë dalë në dritë fakte, që tregojnë se ata s’kanë qenë as në parlament, as në Tiranë, as në Shqipëri atë ditë. Aleanca Kuq e Zi ka bërë disa verifikime, nga të cilat rezulton se deputeti Gëzim Dibra e ka lënë vendin më 19 qershor për t’mos u kthyer më në parlamentin shqiptar; ai ndërroi jetë, pas një sëmundje të rëndë, më 12 gusht. Ndërsa deputeti Lefter Maliqi  është larguar më 1 korrik dhe është kthyer më datën 12, disa ditë pas miratimit të ligjit, ku paska votuar dhe ai vetë pa qenë i pranishëm. Por edhe pa këto fakte (është e lavdërueshme puna e Aleancës Kuq e Zi në këtë mes), u mor vesh qysh atë ditë, kur u votua në parlament, se dikush tjetër votoi për ta, duke dhunuar kështu një princip kushtetues që thotë se “vota e deputetit nuk delegohet”.

Kështu që manipulimi është i plotë, dhe i dokumentuar (në rubrikën Video të këtij website-i do mund të gjeni pamje filmike nga séanca parlamentare e asaj dite). Pritet reagimi i njerëzve të maxhorancës, në radhë të parë i kryetares së parlamentit Topalli dhe të kryeministrit Berisha. Do të reagojnë?

E.G.