Këta e kanë Sy, nuk ka shpjegim tjetër

Lidershipi politik i Shqipërisë është i mbushur me leshko. Dhe në kohën e Enver Hoxhës të thoshin “duhet të shkosh Lart”, me nënkuptimin se “këta poshtë janë mizerje”.

I njëjti mentalitet vazhdon edhe sot. Ka një Lart dhe disa Poshtë që bëjnë hatanë dhe tjetërsojnë vullnetin e mirë të udhëheqësit.

Kryeministrin e tanishëm e gënjejnë të gjithë: ai i fton në qeverisje njerëzit për ta bërë Shqipërinë bahçe me lule, maskarenjtë qeshin e përkulen e nisin të vjedhin. Pa frena fare. Na e nxjerrin komandantin tekayt komplet: ditë e natë duke menduar për Shqipërinë, për Ne vegjëlinë, ata batërdinë nga ana tjetër. Të gjithë. Aq sa shumëkush ka nisur të mendojë për të ndërmarrë një nismë për të ruajtur Kryeministrin nga këta maskarenj, por edhe nga syri i keq. 

Nuk është vetëm. Edhe te PD-ja, më saktë te të gjitha pëdëtë, ndodh e njëjta gjë. Sot, një media pranë Rithemelimit shkruante se Lulzim Basha e përdori PD-në për gjoba. Se ai ka marrë aq kate në një kullë, se kunati kështu e ashtu. Basha ky! Imagjino ç’bëhet! Duke qeshur, duke ngjeshur. Vazhdo ne këtej, d.m.th Berisha për kauzën e demokracisë. Hiç ai. Gjoba dynjaja. E çuditshme është që qytetari digjital nuk e zbuloi gjobvënësin. Ndoshta sepse ishte duke gjurmuar ndonjë shkrimtar gjobëvënës, ose ku ta dish!

Vetëm Ilir Meta ka qenë i qartë. Ai ka folur për gabime të LSI-së, me lënie mandatesh etj. Nuk është ankuar asnjëherë për gjobaxhinj pas kurrizit të tij. Po kur digjesh nga qulli i fryn kosit. Dhe ajo videoja duket se e bëri esëll se në 2002-n çyryk ishte edhe ky.

Si të bëhet kjo Shqipëri me këta liderë që i tërheqin për hunde vartësit? Po kjo pyetje të torturon, të mundon e të çmend. Me inteligjencë artificiale? Po ku ta çosh këtë inteligjencën alla frënga që të na bëjë edhe ne njerëz? Pastaj, po morëm ne inteligjencën alla frënga, ç’a të bëjmë me Saliun, Edin, Ilirin, këta tuhafë që nuk dinë gjë? Se çfarë bëhet e çfarë nuk bëhet në partitë e tyre. Këta janë peshkopë o xhan: këta me të hyrë në zyrë vetëm lexojnë për Futurin tonë. Ja pra kur punon për atdhenë, me mendje dhe pendë, se çfarë pëson nga sojsëzët.

Ç’të bëjmë? – pyeste dikur Hazreti Lenin.

s.zaimi